маориф
«Оё раванди
таълим
ба мақсад
мувофиқ аст?»
Раёсати маорифи мақомоти иҷроияи ҳокимияти давлатии вилояти Хатлон мақолаи хабарнигор Мунаввари Сафар «Оё раванди таълим ба мақсад мувофиқ аст?»-ро, ки 16 июни соли 2009 дар рӯзномаи «Ҷумҳурият» ба табъ расид, дар мушовараи Раёсати маорифи вилоят мавриди баррасӣ қарор дод.
Аз таҳлил маълум гардид, ки камбудиҳои дар мақола зикрёфта қисман ҷой дошта, ҳалли худро тақозо доранд. Масалан, иҷро нагардидани талаботи қарори Ҳукумати Ҷумҳурии Тоҷикистон аз 3 марти соли 2007, № 105 «Дар бораи Хадамоти давлатии назорат дар соҳаи маориф», сари вақт таъмин нагаштани бахшҳои хадамот бо кормандони соҳибихтисос, феҳрасти воҳидҳои кории хизмати давлатӣ, маводи дастурию методӣ, инчунин ҳуҷҷатҳои расмию зарурӣ аз ҷумлаи онҳост.
Бояд зикр кард, ки алҳол мушкилоти асосӣ ҷиҳати иҷрои бандҳои якум, чорум ва замимаи 3-юми Қарори Ҳукумати Ҷумҳурии Тоҷикистон аз 3 марти соли 2007, № 105 «Дар бораи Хадамоти давлатии назорат дар соҳаи маориф» ва фармони вазири маорифи Ҷумҳурии Тоҷикистон аз 29 марти соли 2007, № 387 «Дар бораи таъсиси бахшҳои Хадамоти давлатии назорат дар соҳаи маориф» дар вилоят, бахусус дар ҳайати пурра таъсис нашудани бахшҳо дар шаҳру ноҳияҳо (Қӯрғонтеппа, Ховалинг, Қумсангир, Вахш, Темурмалик ва Балҷувон) ҷой доранд, ки ҳалли саривақтии худро металабанд.
Шӯъбаи вилоятӣ ва бахшҳои шаҳрию ноҳиявии Хадамоти давлатии назорат дар соҳаи маориф аз давраи аввали фаъолият аз 1301 мактаби таҳсилоти умумӣ 1298 -тоашро аз аттестатсияи давлатӣ гузаронида, ба фаъолияти 986 таълимгоҳ баҳои мусбат дод. 306 муассиса бинобар ҷой доштани норасоиҳо аз аттестатсияи давлатӣ шартан гузашт, 6 муассисаи таълимӣ аз аттестатсия нагузашт.
Маврид ба зикр аст, ки то давраи таъсисёбии шӯъбаи вилоятии бахшҳои хадамот ва комиссияҳои аттестатсионии муассисаҳои таьлимии назди шӯъбаҳои маорифи шаҳру ноҳияҳои вилоят муассисаҳои таълимӣ аз аттестатсияи давлатӣ аз тарафи комиссияҳои аттестатсионии шӯъбаҳои маорифи шаҳру ноҳияҳо гузаронида шудаанд. Санҷишҳо нишон доданд, ки комиссияҳои аттестатсионӣ ин вазифаро ҳамчун сарбории иловагӣ ба дӯш доштанд ва нисбати ин масъала ҳуҷҷатгузорӣ нашуда, танҳо иҷозатномаҳо (литсензияҳо) бо нусхабардории одӣ дода шудаанд.
Муассисаҳои таълимие, ки мӯҳлати аттестатсия гузаштанашон ба охир мерасад, мувофиқи нақшаи тасдиқшуда, аз нав аттестатсия мешаванд.
Раёсати маорифи мақомоти иҷроияи ҳокимияти давлатии вилояти Хатлон барои иҷрои вазифаҳо ва ислоҳи камбудиҳои худ аз тамоми имконияту воситаҳои зарурӣ истифода бурда, баҳри дар мӯҳлатҳои кӯтоҳтарин бартараф намудани камбудиҳои дар мақола зикрёфта кӯшиш ба харҷ медиҳад.
Ҷ. СОБИРОВ,
сардори Раёсати маорифи
вилояти Хатлон
Баёни ақида (0) Санаи нашр: №: Мутолиа карданд: 5627
