ҳуқуқ
ҶИНОЯТ ва ҶАЗО
ИФРОТГАРОӢ
Боз як тарғибгари терроризм 16 сол ҳабс шуд
Суди ноҳияи Исмоили Сомонии шаҳри Душанбе як мубаллиғи гурӯҳи ифротгарои ба ном «Давлати исломӣ»-ро ба муҳлати 16 сол аз озодӣ маҳрум кард.
Дар ин бора маркази матбуоти Прокуратураи генералии Ҷумҳурии Тоҷикистон хабар дод. Бино ба иттилои манбаъ, шаҳрванд Мирсаид Мирзоев замони муҳоҷирати кориаш дар Федератсияи Русия ба ташкилоти экстремистӣ-террористии “Давлати исломӣ ” шомил шуда, чанд тан аз шаҳрвандони дигари Тоҷикистонро барои пайвастан ба гурӯҳҳои террористӣ ва иштирок дар даргириҳои Сурия ҷалб намудааст.
Баррасии парвандаи ҷиноятӣ нисбат ба Мирсаид Мирзоев бо дастрасии моддаҳои 4011, 187 қисми 2, 3073 қисми 2 - и Кодекси ҷиноятии Ҷумҳурии Тоҷикистон дар суд нишон додааст, ки номбурда, ҳамчунин, моҳи сентябри соли 2015 мехост ба Сурия сафар намояд. Зимни сафар ба Сурия дар шаҳри Истанбули Туркия бо аъзои фаъоли ташкилоти мазкур вохӯрда, бо супориши онҳо барои ҷалби шаҳрвандон ба узвияти ин гурӯҳи террористӣ моҳи октябри соли 2015 ба Ҷумҳурии Тоҷикистон баргаштааст.
Қасди амалӣ намудани ҳаракатҳои ҷинояткоронаи Мирсаид Мирзоев аз назари заррабини мақомоти ҳифзи ҳуқуқи мамлакат дур намонд ва ба ҷазои қонун гирифтор шуд, ки сабақе барои дигар афроди ҷиноятпеша аст.
НАФС
директор ва омӯзгори коллеҷи тиббиро ба ҷиноят кашид
Кормандони мақомоти корҳои дохилӣ директор ва як омӯзгори коллеҷи тиббии шаҳри Конибодоми вилояти Суғдро ба гумони гирифтани пора дастгир намуданд.
Тибқи иттилои сомонаи Вазорати корҳои дохилӣ, ин афрод рӯзи 4-уми июли соли ҷорӣ, бо маслиҳати пешакӣ, барои ба коллеҷ дохил намудани ҷавонписари 22 - солаи шаҳри Исфара, аз зани 54 - солаи сокини ноҳияи Бобоҷон Ғафуров 1800 доллари амрикоӣ ҳамчун пора талаб намудаанд.
Боздошти онҳо баъд аз зӯҳри 12 июл дар дафтари кории директори коллеҷи тиббӣ ҳангоми гирифтани маблағи нишондодашуда сурат гирифта, вобаста ба ин ҳолат парвандаи ҷиноятӣ оғоз ва тафтишот идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 17.07.2017 №: 148 Мутолиа карданд: 1120
