ҳуқуқ
МАШҚҲОИ ЗИДДИТЕРРОРИСТӢ БО ҶАЛБИ ЗИЁДА АЗ 10 ҲАЗОР НИЗОМӢ
Бо супориши Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва тибқи нақшаи муштараки маҷмӯи чорабиниҳои асосии Қувваҳои Мусаллаҳи ҷумҳурӣ барои соли 2017 дар ҳудуди Вилояти Мухтори Кӯҳистони Бадахшон машқҳои зиддитеррористӣ бо ҷалби зиёда аз 10 ҳазор нафар ҳайати шахсӣ гузаронда шуданд.
Аз маркази матбуоти Вазорати мудофиа ба «Ҷумҳурият» иттилоъ доданд, ки машқҳои стратегии зиддитеррористӣ ахиран дар тамрингоҳи низомии мавзеи Теми шаҳри Хоруғ ба охир расиданд. Дар амалиёти муштараки ҷузъу томҳо вазири мудофиаи Ҷумҳурии Тоҷикистон Шералӣ Мирзо, раиси Вилояти Мухтори Кӯҳистони Бадахшон Шодихон Ҷамшед, раисони шаҳру ноҳияҳои вилоят ва роҳбарони сохторҳои қудратӣ иштирок доштанд. Машқҳо бо ҷалби ҷузъу томҳои таъйиноти махсуси сохторҳои низомии гарнизони Хоруғ аз рӯи унсурҳои гуногуни зиддитеррористӣ ҷараён гирифта, дар онҳо силоҳу муҳимоти ҷангӣ, тайёраҳо, техникаи зиреҳпӯш ва васоити артиллериву автомобилӣ истифода гардиданд.
Вазири мудофиаи мамлакат Шералӣ Мирзо зимни натиҷагирӣ аз даври ниҳоии маҷмӯи машқҳои муштарак оид ба дастуру супоришҳои Сарфармондеҳи Олии Қувваҳои Мусаллаҳи Ҷумҳурии Тоҷикистон муҳтарам Эмомалӣ Раҳмон дар самти сиёсати дифоии кишвар, омодагӣ баҳри пешгирӣ аз таҳдиду хатарҳо ва ба сатҳи боз ҳам баланд бардоштани иқтидори мудофиавии кишвар ибрози андеша кард. Вазири мудофиа моҳият ва ҳадафи баргузории чунин тамринҳои васеи низомиро барои таъмини амнияти давлату миллат муҳиму манфиатбахш арзёбӣ намуда, баён дошт: «Минтақаи Бадахшони Тоҷикистон аз ҷиҳати ҷойгиршавӣ ва мавқеи геополитикӣ дар маркази таваҷҷуҳи гурӯҳҳои бадхоҳ қарор дошта, доир намудани чунин машқҳои низомӣ барои посухи сазовор ба ҳар гуна таҳдиду фишорҳои гурӯҳҳои ифротгарою даҳшатафкан муҳим ва саривақтӣ мебошад».
Ба иттилои манбаъ, дар анҷоми машқҳои муштараки зиддитеррористӣ иддае аз афсарону сарбозон бо медалу ифтихорномаҳо, рутбаҳои навбатии ҳарбӣ ва дигар туҳфаҳои хотиравӣ сарфароз гардонда шуданд.
Лашкар ШАРИФ, «Ҷумҳурият»
Баёни ақида (0) Санаи нашр: 25.07.2017 №: 155-156 Мутолиа карданд: 1208
