ҳуқуқ
ҶИНОЯТ ва ҶАЗО
Боздошти сармуҳосиб барои гирифтани пора
Сармуҳосиби Муассисаи давлатии «Маркази барномаҳои байналмилалӣ»-и Вазорати маориф ва илми Ҷумҳурии Тоҷикистон Алишер Солиев бо ҷурми гирифтани пора аз як довталаб боздошт шуд.
Дар ин бора аз маркази матбуоти Агентии назорати давлатии молиявӣ ва мубориза бо коррупсияи Ҷумҳурии Тоҷикистон хабар доданд. Бино ба иттилои манбаъ, Алишер Солиев барои дохил намудани як шаҳрванд ба факултети информатикаи Донишкадаи миллии Ҷумҳурии Мардовияи Федератсияи Русия ба сифати пора 1900 доллари амрикоӣ талаб намудааст. Номбурда ҳангоми гирифтани ин маблағ аз ҷониби кормандони агентӣ дар ҷойи ҳодиса дастгир гардида, далели шайъӣ ёфта, гирифта шуд.
Дар робита ба ин амал нисбат ба Алишер Солиев бо аломатҳои моддаи 319 қисми 1-и Кодекси ҷиноятии Ҷумҳурии Тоҷикистон парвандаи ҷиноятӣ оғоз шуда, тафтишоти пешакӣ идома дорад.
Кушторе, ки бо 11 зарби корд анҷом ёфт
Рӯзи 22 июл сокини 41-солаи шаҳри Қӯрғонтеппа дар пайи як муноқиша бо 11 зарби корд сокини дигари ҳамин шаҳрро ба ҳалокат расондааст.
Бино ба иттилои сомонаи Вазорати корҳои дохилӣ, як рӯз пас аз ҳодиса зимни гузарондани чорабиниҳои оперативӣ - ҷустуҷӯӣ аз ҷониби кормандони милитсия ин мард ҳамчун гумонбар дар содир намудани ҷинояти куштор дастгир шуда, аз рӯи ин ҳодиса парвандаи ҷиноятӣ оғоз гардид.
Ришваситонӣ бо истифода аз мақоми хизматӣ
Кормандони раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар минтақаи Кӯлоби вилояти Хатлон бар асоси муроҷиати шаҳрванд «А» корманди комиссариати ҳарбии ноҳияи Мир Сайид Алии Ҳамадонӣ Исматулло Ғайратовро ҳангоми гирифтани пора дастгир карданд.
Тибқи гузориши сомонаи агентӣ, номбурда бо истифода аз мақоми хизматӣ барои тайёр карда додани билети ҳарбии муваққатӣ (ноқобил) аз шаҳрванд «А» 1600 сомонӣ гирифта, барои анҷоми ин кор боз 2800 сомонӣ талаб кардааст.
Корманди комиссариати ҳарбӣ ҳангоми гирифтани 2800 сомонӣ боздошт ва алайҳи ӯ бо дастрасии моддаи 247 қисми 2, бандҳои «в, г»-и Кодекси ҷиноятии Ҷумҳурии Тоҷикистон парвандаи ҷиноятӣ оғоз шудааст.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 26.07.2017 №: 157 Мутолиа карданд: 1194
