ҳуқуқ
ҲАР КӢ ХАНДОНАД ЯТИМИ ХАСТАРО…
Комиссия оид ба ҳуқуқи кӯдаки мақомоти иҷроияи маҳаллии ҳокимияти давлатии ноҳияи Темурмалик ба масъалаҳои ҳалталаби марбут ба ҳаёти ноболиғону ҷавонон таваҷҷуҳи хос зоҳир намуда, дар ин самт корҳои муайянро анҷом додааст.
Бино ба иттилои Суҳбатулло Сафаров, сармутахассис оид ба ҳифзи ҳуқуқи кӯдаки мақомоти иҷроияи маҳаллии ҳокимияти давлатии ноҳия, комиссия дар ҳамкории зич бо бахши ҷавонон ва варзиш, оид ба корҳои дин, танзими анъана ва ҷашну маросимҳои миллӣ, кор бо занон ва оила, хадамоти пешгирии ҳуқуқвайронкунӣ дар байни ҷавонон ва ноболиғони ШВКД-и ноҳия дар ҷамоатҳои шаҳраку деҳот ва муассисаҳои таълимӣ ҷиҳати пешгирии шомилшавии ҷавонон ба ҳизбу ҳаракатҳои террористию экстремистӣ, пӯшидани либоси ба фарҳанги мо бегона, шабгардӣ ва дарсгурезии ноболиғон суҳбату вохӯриҳои судманд гузарондааст. Мутаассифона, соли ҷорӣ як ҳодисаи худкушӣ аз ҷониби ноболиғ Раҷабалӣ Сафаров, сокини Ҷамоати деҳоти Танобчӣ, ба амал омад. Тибқи хулосаи табибон ин ноболиғ баъди гирифтор шудан ба бемории рӯҳӣ даст ба худкушӣ задааст.
Дар нимсолаи аввал ба комиссия оид ба ҳуқуқи кӯдаки ноҳия шаш парвандаи фарзандхондӣ ворид гардида, қаноатбахш гардонда шуданд. Дар ноҳия барои дастгирии шахсони яккаю танҳо ва дигар гурӯҳҳои эҳтиёҷманд тадбирҳои зарурӣ андешида мешаванд. Дар арафаи иду ҷашнҳои миллӣ дар Ҷамоати деҳоти ба номи Саидмуъмин Раҳимов аз тарафи шахсони саховатманд ба 214 нафар маъюб, ятим ва оилаҳои камбизоат ба маблағи 23 ҳазору 450 сомонӣ кумак расонда шуд. Инчунин, намозгузорони масҷидҳои ҷамоат ба ятимон кумаки моддӣ расонданд.
Ба гуфтаи Суҳбатулло Сафаров, чунин иқдом дар Ҷамоати деҳоти ба номи Бобоюнус низ рӯи даст гирифта шуд. Шахсони саховатманд ба 30 нафар кӯдаки маъюб ба маблағи 2265 сомонӣ ёрии яквақта расонданд. Инчунин, яке аз саховатмандони Ҷамоати шаҳраки Совет ба 60 оилаи камбизоат ва ниёзмандон ба маблағи 180 ҳазор сомонӣ кумак расонд. Саховатмандони Ҷамоати деҳоти Қарақамиш, 516 оилаи камбизоат, маъюб ва собиқадорони ҷангу меҳнатро аз ҷиҳати моддӣ дастгирӣ карданд.
Сафаргул АЛИМОВА, «Ҷумҳурият»
Баёни ақида (0) Санаи нашр: 24.08.2017 №: 180 Мутолиа карданд: 1184