ҳуқуқ
КОРРУПСИЯ. АЗ ТАНБЕҲ ТО САБУКДӮШӢ АЗ ВАЗИФА
Агентии назорати давлатии молиявӣ ва мубориза бо коррупсияи Ҷумҳурии Тоҷикистон баҳри вусъат бахшидани низоми мубориза бар зидди ҳуқуқвайронкуниҳо ва ҷиноятҳои хусусияти коррупсионидошта, дар доираи ваколатҳои худ таъмини ҳуқуқу озодиҳои инсон ва шаҳрванд, амнияти иқтисодии давлат, шаффофият ва такмили фаъолияти назоратию тафтишотӣ корҳои муайянеро анҷом медиҳад.
Дар зарфи шаш моҳи соли ҷорӣ ба агентӣ 2505 муроҷиати шахсони воқеӣ ва ҳуқуқӣ ворид гардидааст, ки аз ин 799 муроҷиат қонеъ ва 636 муроҷиати дигар аз рӯи тобеияти санҷишӣ ба ниҳодҳои дахлдор ирсол шудааст. Аз муроҷиатҳои баррасишуда нисбат ба 172 адади он парвандаи ҷиноятӣ оғоз гардида, 224 муроҷиат ба парвандаҳои ҷиноятӣ ҳамроҳ гаштааст. Гузашта аз ин, бо назардошти натиҷаи санҷиши 247 муроҷиати шаҳрвандон Қонуни Ҷумҳурии Тоҷикистон «Дар бораи авф» татбиқ гардидааст.
Сулаймон Султонзода, директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон, бо баёни ин матлаб иброз дошт, ки дар давраи ҳисоботӣ ҷиҳати пешгирии ҷиноятҳо ва ҳуқуқвайронкуниҳои коррупсионӣ аз ҷониби кормандони ин ниҳод 710 ҳолати ҳуқуқвайронкуниҳои маъмурии хусусияти коррупсионидошта ошкор шуда, нисбат ба онҳое, ки талаботи қонунро вайрон намудаанд, ба маблағи 686,1 ҳазор сомонӣ ҷарима татбиқ гардидааст. Дар ин муддат 628,5 ҳазор сомонии он ба Буҷети давлат ворид шудааст.
Директори агентӣ ба масъалаи дар баъзе ҳолатҳо риоя нагардидани талаботи Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» таваҷҷуҳ зоҳир намуда, зикр сохт, ки танҳо дар нимсолаи аввал 125 ҳолати қонуншиканӣ ошкор гардида, барои татбиқи ҷавобгарии маъмурӣ ба мақомоти ваколатдор ирсол шудааст.
Ҳамзамон, ба роҳбарони вазорату идораҳо, корхонаю муассисаҳои дахлдор 2184 дастури хаттӣ ва 627 пешниҳод оид ба бартарафсозии омилҳои коррупсионӣ ва шароитҳои ба онҳо мусоидаткунанда ирсол гаштааст. Аз шумораи умумии дастуру пешниҳодҳои ирсолгардида 1705 дастури хаттӣ ва 354 пешниҳод мавриди баррасӣ қарор гирифта, сабабу омилҳои ба коррупсия мусоидаткунанда бартараф карда шудаанд. Дар натиҷаи баррасии дастуру пешниҳодҳои зикршуда нисбат ба 192 нафар огоҳӣ, 197 нафар сарзаниш, 288 нафар танбеҳ татбиқ гашта, 78 нафар аз вазифаи ишғолнамудааш озод гардидааст.
Ба агентӣ 692 лоиҳаи санадҳои меъёрии ҳуқуқӣ ворид гардидааст, ки 652 адади он мавриди баррасӣ қарор гирифта, 114 - тои дигар ҷиҳати бартараф намудани камбудиҳо баргардонда шудааст. Зимни баррасии лоиҳаи санадҳои меъёрии ҳуқуқӣ дар 95 лоиҳа омилҳои бавуҷудоварандаи коррупсия ошкор гаштааст. Кормандони агентӣ дар рафти санҷишҳо, инчунин, 19 ҳолати хизмати якҷоя ва таъйини хешовандони наздикро ба мансабҳои давлатӣ ошкор намудаанд.
Додоҷон РӮЗИЕВ, «Ҷумҳурият»
Баёни ақида (0) Санаи нашр: 31.08.2017 №: 186 Мутолиа карданд: 1372
