мулоқотҳо
МУЛОҚОТИ ПЕШВОИ МИЛЛАТ БО САРВАЗИРИ КАНАДА
20 сентябр дар шаҳри Ню - Йорк дар ҳошияи Иҷлосияи 72 - юми Маҷмаи умумии Созмони Милали Муттаҳид Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Сарвазири Канада Ҷастин Трюдо мулоқоти самимӣ ва созанда анҷом доданд.
Таъкид гардид, ки имсол аз барқароршавии муносибатҳои дипломатии Тоҷикистон ва Канада 25 сол сипарӣ мешавад ва дар ин давра ҳамкориҳои байнидавлатӣ, ки дар асоси усулҳои ҳусни эҳтиром, эътимод ба ҳамдигар ва эътирофи мутақобилаи манфиатҳо оғоз ёфтаанд, дар соҳаҳои мавриди таваҷҷуҳ рушду такомул пайдо кардаанд.
Сарвари давлат Эмомалӣ Раҳмон изҳор доштанд, ки ҷониби Тоҷикистон кумакҳои Канадаро ба сохторҳои қудратӣ, таҳкими марз бо Афғонистон, мубориза бар зидди гардиши ғайриқонунии маводи мухаддир, дастгирии фаъолияти коллеҷи марзбонии САҲА дар Тоҷикистон, ширкати коршиносони кишвари Канада дар татбиқи лоиҳаҳои ҳаётан муҳим барои Тоҷикистон ва Афғонистон баланд арзёбӣ менамояд.
Барои тақвияти муносибатҳои дуҷониба дар соҳаҳои иқтисоду тиҷорат, энергетика, нақлиёт, технологияҳои коркарди маҳсулоти кишоварзӣ, амнияту бехатарӣ ва идоракунии сарҳад фикру мулоҳизаҳои судманд баён карда шуданд.
Дар робита ба хатару чолишҳои афзояндаи ҷаҳони муосир ҷонибҳо зарурати тақвияти ҳамгироиҳои байнидавлатиро дар мубориза бар зидди терроризму экстремизми байналмилалӣ ва қочоқи маводи мухаддир таъкид намуданд.
Табодули афкори судманд доир ба дигар мавзӯъҳои мавриди таваҷҷуҳ низ сурат гирифт.
Мулоқот дар рӯҳияи созанда ва ҳамдигарфаҳмӣ ҷараён гирифт. Пешвои миллат муҳтарам Эмомалӣ Раҳмон аз Сарвазири Канада Ҷастин Трюдо даъват ба амал оварданд, ки дар фурсати барояш муносиб аз Тоҷикистон боздид намояд.
Баёни ақида (0) Санаи нашр: 21.09.2017 №: 199 Мутолиа карданд: 2389
