ҳуқуқ
ШАҲРИ ИСФАРА. МАҚСАД - ТАЪМИНИ АДОЛАТ
Татбиқи босамари Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» нишон дод, ки қабули ин санади меъёрии ҳуқуқӣ воқеан ҳам тақозои ҷомеаи муосири тоҷик аст. Зеро он ба ҳайси аввалин қонуни миллӣ истифодаи сармояҳои фардиву оилавиро на дар роҳи хароҷоти беҳуда, балки ба манифати худи онҳо равона сохт.
Раванди муҳокимаи оммавӣ ва таклифу пешниҳоди сокинони мамлакат оид ба ворид намудани тағйиру иловаҳо ба қонуни мавриди назар ин ҳақиқатро бозгӯ намуд, ки ҳар сатри он садои қалбу хостаҳои мардум аст. Сокинони равшанзамири шаҳри Исфара нақши ин санади муҳимро дар рифоҳи зиндагии хеш ба хубӣ дарк намуда, танзими оқилонаи маърака ва ҷашну маросимҳоро дар доираи талаботи он ба роҳ мондаанд. Ба дурустӣ эҳсос шуд, ки қонун на танҳо ба танзими расму оинҳо мусоидат намуд, балки ҳамагонро ба фарҳанги рӯзгордорӣ, ҳифзи арзишҳои милливу суннатҳои мардумӣ ҳидоят намуд.
Вале, бо вуҷуди дастовардҳои қобили мулоҳиза, дар низоми оростани ҷашну маъракаҳо камбудиҳо пурра аз байн нарафтаанд ва ҳолатҳои риоя нагардидани меъёрҳои қонуну зиёдаравии афроди гуногун низ ба чашм мерасанд, ки мо онро дар таҷрибаи судӣ мушоҳида намудем. Баррасии се парвандаи ҳуқуқвайронкунӣ дар робита ба риоя нагардидани муқаррароти Қонуни Ҷумҳурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон”, ки ахиран дар суди шаҳр сурат гирифт, далели ин гуфтаҳост.
Аз ин рӯ, вобаста ба пешгирии ҳар навъ қонуншикании вобаста ба танзим судяҳои суди шаҳри Исфара бо мардум суҳбату вохӯриҳо ташкил намуда, перомуни моҳияти он корҳои фаҳмондадиҳӣ анҷом доданд. Гузашта аз ин, дар маҳалҳои гуногун маҷлисҳои сайёри судӣ ба роҳ монда, дар ҷараёни он, зарурати ворид намудани тағйиру иловаҳо ва паёмади риоя накардани талаботи қонунро матраҳ намуданд, ки аз манфиат холӣ нахоҳад буд. Дар суҳбат бо сокинони касбу кори гуногун таъкид шуд, ки муҳтавои матни қонун аз мушкилу муаммоҳои зиндагии иҷтимоӣ сарчашма гирифта, ҳадафи аслии он ҳифзи ҳамаҷонибаи манфиатҳои иқтисодию иҷтимоии мардуми кишвар аст.
Бо назардошти он ки қонуни мазкур ҷашну маросим ва суннатҳои диниву мардумиро бар пояи арзишҳои миллӣ танзим намуда, дар ҷомеа ислоҳоти маънавиро асос гузоштааст, бояд ҳамагон дар татбиқи босамари минбаъдаи он низ даст ба кор бошем ва бо иҷрои талаботи қонун барои худу дигарон зиндагии шоистатеро таъмин созем.
Комилҷон ҒАНИЗОДА,
судяи суди шаҳри Исфара
Баёни ақида (0) Санаи нашр: 12.10.2017 №: 213 Мутолиа карданд: 1671
