маориф
ДОНИШГОҲИ ДАВЛАТИИ ДАНҒАРА. МАҚСАД ТАРБИЯИ КАДРҲОИ РАҚОБАТПАЗИР
Сохтмони бинои Донишгоҳи давлатии Данғара моҳи марти соли 2008 оғоз гардида, он 1 сентябри соли 2016 дар Рӯзи дониш дар рафти сафари кории Президенти кишвар муҳтарам Эмомалӣ Раҳмон ба ноҳияи Данғара мавриди баҳрабардорӣ қарор гирифт. Инфрасохтори донишгоҳ имконият медиҳад, ки устодон ва шогирдон дар робитаи мустақил ва доимӣ қарор дошта, вақти худро бештар ба таълиму тарбия ва омӯхтани донишҳои замонавӣ сарф намоянд.
Ҳамзамон бояд гуфт, ки сохтори идоравии имрӯзаи донишгоҳ мутобиқ ба муассисаҳои таҳсилоти олии касбии кишвар дар заминаи низомномаҳои тасдиқкардаи Вазорати маориф ва илми ҷумҳурӣ мебошад. Алҳол Шоҳиён Нуралӣ Набот, доктори илмҳои педагогика, номзади илмҳои техникӣ, сарварии донишгоҳро ба уҳда дорад. Дар он ҷиҳати ба танзим даровардани ҷараёни таълим 5 талаботи касбӣ - тахассусӣ барои ҳамаи кормандон, маҷмӯи низомномаҳо оид ба ташкили марказҳои таълимӣ – тренинги равияҳои гуногун, 7 талаботи рақобатпазирии донишҷӯён дар бозори озоди меҳнат, 64 адад нақшаи таълимии намунавии зинаи бакалавр, 17 адад нақшаи таълимии зинаи магистратура ва 3 адад нақшаи таълимии ихтисосҳои ғоибона таҳия гардидааст. Донишгоҳ тайёр намудани мутахассисони касбиро дар соли таҳсили 2017 – 2018 дар 6 факултет ва 20 кафедра аз рӯи ихтисосҳои педагогика ва технологияҳои таълимотии муосир, иқтисодиёти инноватсионӣ ва менеҷмент, аграрӣ ва истифодаи захираҳои табиӣ, муҳандисӣ ва технологияи муосири истеҳсолӣ, идораи давлат ва ҳуқуқ ва як кафедраи умумии донишгоҳии ҳарбӣ, дар асоси низоми бисёрзинагии таҳсилот ба роҳ мондааст. Ҳоло дар донишгоҳ 4 ҳазору 57 нафар донишҷӯ аз Вилояти Мухтори Кӯҳистони Бадахшон, вилоятҳои Суғду Хатлон ва ноҳияҳои тобеи марказ ба таҳсил фаро гирифта шудаанд. Ҳамзамон дар донишгоҳ мутахассисонро аз рӯи 54 ихтисос дар зинаи бакалавр ва 8 ихтисос дар зинаи магистр тайёр карда истодаанд. Дар шуъбаи аспирантураи донишгоҳ аз рӯи 23 тахассус унвонҷӯ ба тадқиқотҳои илмӣ машғул мебошад.
Холназар КАСИРОВ, «Ҷумҳурият»
Баёни ақида (0) Санаи нашр: 30.10.2017 №: 223 Мутолиа карданд: 2186
