мулоқотҳо
МУЛОҚОТИ ЭМОМАЛӢ РАҲМОН БО АРА БАБЛОЯН
30 октябр дар Қасри миллат Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Раиси Маҷлиси миллии Ҷумҳурии Арманистон Ара Баблоянро ба ҳузур пазируфтанд.
Дар суҳбати самимӣ, ки дар фазои ҳусни тафоҳум ва ҳамдигарфаҳмӣ ҷараён гирифт, аз сатҳу сифати ҳамкориҳои гуногунҷанбаи Тоҷикистон ва Арманистон, хусусан равобити байнипарлумонӣ ва муколамаи доимии сиёсии сатҳи баланд дар давоми 25 соли барқарории муносибатҳои байнидавлатӣ изҳори қаноатмандӣ карда шуд.
Тавре таъкид гардид, иҷрои мувофиқаҳои дар ҷараёни сафари расмии Президенти Ҷумҳурии Тоҷикистон Эмомалӣ Раҳмон ба Ҷумҳурии Арманистон дар моҳи июни соли равон бадастомада, заминаи мусоид ва имконияти фарохеро барои рушду тавсеаи бештари муносибатҳои байнидавлатии манфиатбор фароҳам меоварад.
Дар ҳамин робита изҳори умед шуд, ки сафари Раиси Маҷлиси миллии Ҷумҳурии Арманистон Ара Баблоян ба Ҷумҳурии Тоҷикистон низ ба рушду тавсеаи ҳамкориҳои байнидавлатӣ ва байнипарлумонии Тоҷикистону Арманистон такони тоза мебахшад.
Ҷонибҳо оид ба тақвияти ҳамкориҳои байнидавлатӣ дар соҳаҳои иқтисоду тиҷорат, илму фарҳанг ва равобити байнипарлумонию ҷамъиятӣ ҳам дар асоси дуҷониба ва ҳам дар доираи СММ, САҲА, ИДМ ва СААД фикру мулоҳизаҳои судманд баён намуданд.
Мусоҳибон таъкид доштанд, ки заминаи ҳуқуқию қарордодии муносибатҳои байнидавлатиро беш аз 30 санад ташкил медиҳад, ки ҳамкориҳои ду давлатро дар соҳаҳои гуногун ба танзим медароранд.
Мавқею назари ҳамсон ва ё наздики ду давлат дар бисёр масъалаҳои мубрами ҷаҳони муосир низ таъкид карда шуд.
Вобаста ба ҳалли масъалаҳои амниятӣ, аз ҷумла муборизаи муштарак бо таҳдиду хатарҳои ҷаҳони муосир, ҳамчунин, масъалаи таҳкими ҳифзи марзи давлатӣ ва роҳҳои ҳалли сулҳомези муноқишаҳои сиёсӣ дар кишварҳои олам мавриди баррасӣ қарор дода шуд.
Баёни ақида (0) Санаи нашр: 31.10.2017 №: 224 Мутолиа карданд: 2028
