ҳуқуқ
МАШҚҲОИ МУШТАРАК. ДАР РАМЗГОҲИ «ҲАРБМАЙДОН» НАТИҶАГИРӢ ШУДАНД
Размоиши васеи низомии Қувваҳои муштараки вокуниши фаврии Созмони Аҳдномаи амнияти дастаҷамъӣ, ки дар шаш машқгоҳи низомии гарнизони Хатлон ҷараён дошт, дар размгоҳи «Ҳарбмайдон» - и ин минтақа, бо ҷалби ҷузъу томҳои Қувваҳои Мусаллаҳи кишварҳои узви созмон ҷамъбаст ва натиҷагирӣ карда шуд.
Аз маркази матбуоти Вазорати мудофиаи кишвар иттилоъ доданд, ки дар тамринҳои муштараки низомӣ вазири мудофиаи мамлакат Шералӣ Мирзо, котиби генералии Созмони Аҳдномаи амнияти дастаҷамъӣ Юрий Хачатуров, роҳбарону намояндагони сохторҳои қудратии Тоҷикистон, ҳайати фармондеҳи ҳавзаи марказии ҳарбии Федератсияи Русия, масъулони мақомоти иҷроияи ҳокимияти давлатии вилояти Хатлон, аташеҳои низомии кишварҳои хориҷии муқими Тоҷикистон, намояндагони васоити ахбори оммаи дохилу хориҷ ва дигар шахсони расмӣ иштирок карданд.
Дар амалиёти муштарак ҷузъу томҳои таъйиншудаи СААД, вобаста ба маълумоти разведкаи фазоӣ ва заминӣ, унсурҳои гуногуни зиддитеррористиро тарҳрезӣ карда, бо истифода аз авиатсияву техникаҳои вазнини ҷангӣ, пойгоҳи шартии террористон ва самти ҳаракати афроди ғайриқонунии мусаллаҳро мавриди зарбаҳои мушакӣ қарор доданд.
Вазири мудофиаи кишвар Шералӣ Мирзо, котиби генералии СААД Юрий Хачатуров ва дигар шахсони расмӣ дар назди ҳайати шахсӣ, суханронӣ намуда, доир ба таваҷҷуҳи доимии роҳбарияти олии кишвар баҳри таъмини амнияти давлату миллат, ҳадафу моҳияти баргузории машқҳо ва зуҳури хатарҳои ҷаҳони муосир ибрози андеша карданд. Ҳамоҳангии доимӣ, табодули иттилооту таҷриба дар муборизаи муштараки зиддитеррористӣ ва дӯстиву ҳамдигарфаҳмии ҷузъу томҳо асоси омодагии Қувваҳои Мусаллаҳи кишварҳои узви СААД дар таҳкими сулҳу амнияти минтақа арзёбӣ гардид. Ба иштирокчиёни фаъоли тамринҳои муштараки низомӣ медалу ифтихорнома ва дигар туҳфаҳои хотиравӣ тақдим карда шуд.
Дар доираи баргузории марҳалаи якуми машқҳои муштараки ҳарбӣ дар минтақаҳои наздисарҳадии «Ҳалқаёр ва Ҷайралӣ»-и ҳудуди ноҳияҳои Панҷу Фархор машқҳои ротавӣ-тактикӣ доир гардида, ҷараёни он дар нуқтаи фармондеҳӣ аз ҷониби роҳбарияти Вазорати мудофиаи кишвар ва фармондеҳи Ҳавзаи марказии ҳарбии Федератсияи Русия назорат гардид. Дар доираи баргузории машқҳои васеи ҳарбии Қувваҳои муштараки вокуниши фаврии СААД марҳалаи дуюми размоиши низомии Тоҷикистону Русия дар размгоҳи ҳарбии Лоҳури ноҳияи Рӯдакӣ, машқгоҳҳои Ҳомиёни минтақаи Кӯлоб ва Сумбулаи гарнизони Хатлон, бо ташкили тамринҳои баталионӣ-тактикӣ ҷараён гирифт.
Мақсад аз баргузории машқҳои муштараки низомии Қувваҳои Мусаллаҳи кишварҳои СААД дар Ҷумҳурии Тоҷикистон, пеш аз ҳама, мукаммалгардонии сатҳи омодабошии ҷангии ҷузъу томҳои Қувваҳои муштараки вокуниши фаврии созмони мазкур, тарҳрезии назару муносибати ягонаи кории мақомоти идории ҳарбии кишварҳои аъзо дар ташкили амалиёти муштараки зиддитеррористӣ дар шароити кӯҳистон, бо усули ягона идора кардани Ситоди муштараки муттаҳидаи қӯшунҳо, таъмини бехатарӣ дар минтақа ва табодули таҷриба дар таҳия, ташкил ва баргузор кардани унсурҳои зиддитеррористӣ буд.
Лашкар ШАРИФ,
«Ҷумҳурият»
Баёни ақида (0) Санаи нашр: 21.11.2017 №: 238 Мутолиа карданд: 1528
