маориф
РӮЗГОРЕ БАРОИ ИБРАТ
Умедҷон Музаффаров омӯзгори мо аст. Аз фанни забони англисӣ таълим медиҳад. Фаъолияташро ӯ дар муассисаи таҳсилоти миёнаи умумии № 53 ноҳияи Восеъ чор сол пеш оғоз бахшидааст. Хатмкунандаи Донишгоҳи давлатии Кӯлоб ба номи Абуабдуллоҳи Рӯдакӣ мебошад. Ҳанӯз ду сол пеш аз хатми ин донишгоҳ, яъне соли 2008, ки донишҷӯ буд, ба хонандагони муассисаи таҳсилоти миёнаи умумии № 10 дарс мегуфт.
Бо омадани ин омӯзгор ба мактаби мо омӯзиши фанни забони англисӣ беҳтар ба роҳ монда шуд. Ҳама - чи омӯзгорон ва чи хонандагон эҳсос намуданд, ки ӯ меҳнатдӯст, ташаббус-кор ва серғайрат аст. Бо хастагинопазирӣ кор мекунад.
Муаллими мо тавонист, ки нахуст меҳру муҳаббати фанни таълимияшро дар дилҳои шогирдон ҷой бикунад. Баъд моро неруву боварӣ бахшид, ки омӯхтани забон душворие надорад. Андак бояд дар ин кор масъулиятшинос бошему таваҷҷуҳи хосса бидиҳем.
Аз усулҳои зиёд истифода мебарад. Роҳҳои гуногуни омӯзишро ҷӯё мешавад. Моро водор месозад, ки бештар калимаҳову ибораҳои заруриро азёд бикунем ва боҷасорат бошему озодона, беибо ва бо ӯ ва ҳамсабақон бо ин забон гап бизанем.
Мо, шогирдон, ҳар як дарси ӯро бесаброна интизор мешавем. Бисёр вақт намефаҳмем, ки як соати дарсӣ чӣ гуна зуд гузаштааст.
Дар ду соли охир чор шогирди устод тибқи квотаи президентӣ ба факултаҳои забонҳои хориҷии донишгоҳҳои ҷумҳурӣ дохил шуданд.
Ҳамчунин, чор шогирди ӯ дар олимпиадаҳои вилоятиву ҷумҳуриявӣ ширкат варзида, соҳиби ҷойҳои намоён гардиданд.
Ҳамин тавр, мо ин омӯзгори асилро дӯст медорем, бо ӯ ифтихор мекунем. Муаллими мо на танҳо забони хориҷӣ меомӯзонад, балки моро дар рӯҳияи ватандӯстӣ, дӯст доштани сарзамини аҷдодӣ, тарбия мекунад.
Маҳбуба ОДИНАЕВА,
хонандаи синфи 11 – и муассисаи таҳсилоти
миёнаи умумии № 53, ноҳияи Восеъ
Баёни ақида (0) Санаи нашр: 27.11.2017 №: 243 Мутолиа карданд: 1456
