номаҳо
ПӮСТУ ПАШМИ ЧОРВО ЧУН ГӮШТИ ОН АРЗИШ ДОРАД
Ашёи чармии аз ҷиҳати экологӣ тоза имрӯзҳо дар бозори ҷаҳонӣ арзиши баланд касб намудааст. Чунки талабот ба пойафзолу чамадон аз пӯсти чорво торафт меафзояд. Ҳатто ҷавонон ба рӯйпӯши чармии солуни автомобил ҳаваси зиёд доранд. Аз ин лиҳоз, истифода аз имкониятҳо, хусусан саршумори зиёди чорво дар мамлакат, дар самти истеҳсоли маҳсулоти чармӣ тақозои замон аст.
Аммо бисёри шаҳрвандон баъди забҳи чорво гӯшташро дар як лаҳза пухта истифода мебаранд, вале ба коркарди пӯсту пашми он эътибор намедиҳанд. Он дар шакли ашёи хом ба кишварҳои дигар содир мегардад. Айни замон аз музофоти Урумчии Ҷумҳурии Мардумии Чин дар натиҷаи коркарди пӯстҳои чорвои мардуми мо пойафзолҳои гуногуннавъ истеҳсол гардида, бо нархи даҳчанд ба тоҷирони тоҷик фурӯхта мешавад. Мо онро дар бозору фурӯшгоҳҳои кишвар дида, ангушти ҳайрат мегазем.
Ҳол он ки аз пӯсти як гӯсфанди забҳшуда ду - се сумкаи мактабӣ ва ё ду курткаи чармии аълосифат омода сохтан мумкин аст. Пӯсти як сар чорвои калони шохдор барои тавлиди даҳҳо пойафзол ва тӯпҳои чармӣ имконият медиҳад. Дар ин маврид аз ҷиҳати манфиати иқтисодӣ пӯсту пашми чорво метавонад чун гӯшти он самар диҳад. Пас чаро, ки маҳсулоти ватании худамонро истеҳсол накунем?
Барои дар партовгоҳҳо зоеъ нашудани пашму пӯсти ватанӣ роҳбарони шаҳру ноҳияҳоро месазад, ки мувофиқи барномаҳои қабулкардаи Ҳукумати кишвар пашму пӯсти молҳои забҳшударо зери назорати ҷиддӣ қарор диҳанд ва аз мардум онро харида, барои коркард ба қабулгоҳи махсус супоранд. Дар интиҳои сухан гуфтаниам, ки: мо аз дигарон камӣ надорем.
Раҳмат ШЕРАЛИЕВ, омӯзгор
Баёни ақида (0) Санаи нашр: 11.12.2017 №: 251 Мутолиа карданд: 1455
