маориф
ФАРХОР. МАОРИФ РУШД МЕЁБАД!
Тибқи маълумотҳои оморӣ, дар давраи Истиқлолияти давлатӣ вобаста ба зиёд шудани аҳолии кишвар шумораи муассисаҳои таълимӣ дар ҷумҳурӣ афзуд. Тавре аз дафтари кории шуъбаи маорифи ноҳияи Фархор ба мо иттилоъ доданд, дар ноҳия 58 муассисаи таҳсилоти миёнаи умумӣ, 2 асосӣ, 5 ибтидоӣ, 2 гимназияи давлатӣ, 2 литсей ва 10 муассисаи томактабӣ бо фарогирии 725 нафар кӯдак ва шумораи умумии хонандагон 34 ҳазору 828 нафарро ташкил медиҳад. Дар таълиму тарбияи онҳо 2 ҳазору 211 нафар омӯзгорон муаззаф гаштаанд.
- Таълиму тарбияи хонандагон дар ҳамаи муассисаҳои таълимӣ дар асоси барномаҳои нави Вазорати маориф ва илми ҷумҳурӣ ба роҳ монда шудааст, - гуфт зимни суҳбат мудири шуъбаи маорифи ноҳия Ғазалшоҳ Сафарзода. Инчунин, афзуд, ки имсол ҳамаи муассисаҳои таълимӣ хушсифат аз таъмири ҷорӣ бароварда шуд. Дар ин кор аз ҳисоби буҷаи маҳаллӣ 450 ҳазор сомонӣ масраф гардид. Масъалаи ҷобаҷогузории мутахассисон дар мадди аввал қарор дорад. Зиёда аз 60 нафар омӯзгори ҷавоне, ки тибқи роҳхат ба ноҳия фиристода шуда буданд, ба ҷойи кор пурра таъмин гаштанд. Шуъбаи маориф кӯшиш карда истодааст, ки миқдори муассисаҳои ибтидоиро кам намуда, ба ҷои онҳо муассисаҳои асосиву миёнаи умумии ба талаботи замони муосир ҷавобгӯро бунёд намояд. Умуман, дар даҳ соли охир, дар ҳамаи зинаҳои муассисаҳои таълимии ноҳия дигаргуниҳои назаррас ба чашм мерасанд. Аз ҳисоби тамоми сарчашмаҳои маблағгузор дар зарфи солҳои соҳибистиқлолӣ дар назди 36 муассисаҳои таълимӣ барои 4 ҳазор ҷои нишаст синфхонаҳои иловагӣ сохта шуданд. Аз тарафи соҳибкорони маҳаллӣ Диловар Муҳиддинов, Қурбон Раҳматов ва Абдуғаффор Давлатов 2 муассисаи миёнаи таҳсилоти умумӣ ва як литсейи давлатӣ иборат аз 26 синфхонаи замонавӣ сохта, мавриди истифода қарор гирифтанд. Инчунин, аз ҳисоби соҳибкор Хуршед Нозимов 7 муассисаи таҳсилоти миёнаи умумӣ ва 1 гимназияи давлатӣ ба маблағгузории 16 миллион сомонӣ барои 2 ҳазору 40 хонанда дар арафаи анҷомёбист. Аз ҳисоби буҷаи маҳаллӣ бо маблағгузории 450 ҳазор сомонӣ мактаби дуошёнаи умумии рақами 16 бо сифати баланд аз таъмир пурра бароварда шуд. Соли гузашта маорифчиёни ноҳия соҳиби бинои нави ҷавобгӯ ба замони муосир гардиданд. Бино сеошёна буда, дорои як толори бойгонӣ, як китобхона, як меҳмонхона, 14 утоқи корӣ ва як толори маҷлисгоҳ барои 100 ҷои нишаст мебошад.
- Шароити ҷавобгӯ ба талаботи замон моро водор месозад, ки сифати таълиму тарбияро беҳтар намоем, - гуфт Ғазалшоҳ Сафарзода.
Холназар КАСИРОВ, «Ҷумҳурият»
Баёни ақида (0) Санаи нашр: 12.12.2017 №: 252 Мутолиа карданд: 1256
