номаҳо
ОМАДАМ, ТО БАРОИ МИЛЛАТ ХИДМАТ НАМОЯМ
Мо - ҷавонон ифтихор аз он мекунем, ки зодаи даврони истиқлол ҳастем. Истиқлолияти давлатӣ, ваҳдати миллӣ ва марҳилаҳои мушкили расидан ба ин неъматҳои олӣ барои мо рамзи олии Ватану ватандорӣ, бузургтарин неъмати давлатсозию давлатдорӣ, кору пайкорҳои пайгиронаи созандагӣ ва азму талошҳои фидокоронаи расидан ба истиқлолияти сиёсӣ, иқтисодӣ ва фарҳангиро меомӯзонад.
Аз имкониятҳои нодире, ки давлату Ҳукумати Тоҷикистон барои мо фароҳам овардааст, истифода бурда, соли 2010 ба шаҳри Душанбе омадам ва дар озмуни дохилшавӣ ба донишгоҳҳои хориҷи кишвар иштирок намуда, донишҷӯи Донишгоҳи миллии таҳқиқотии технологии (МИСиС) - и шаҳри Мос-кваи Федератсияи Русия шудам. Соли 2013 барои таҷрибаомӯзӣ ба коргоҳи металлургии нави (Новолипетский металлургический комбинат) - и шаҳри Липетск ва соли 2014 дар Корхонаи тракторбарорӣ ва қолибсозии (Промтрактор - Промлит) Чебоксари Федератсияи Русия ҳамчун ёрдамчии сармуҳандис фаъолият кардам. То моҳи майи соли 2015 дар Корхонаи саноатии нӯшокиҳои Тоҷикистон (Кока - Кола) ҳамчун ёрдамчии муҳандиси технологӣ кору фаъолият намудам. Соли 2015 тибқи бурсияи Федератсияи Русия барои идомаи таҳсил ба Академияи хоҷагии халқ ва хизмати давлатии назди Президенти Федератсияи Русия (РАНХиГС) дохил шуда, онро бо дипломи аъло хатм намудам.
Дар гӯшаву канори гуногуни Русия истиқлолияту ҳамгироии миллатро ҳамчун нишони пойдории давлат, бақои миллат ва шарафу эътибори кишварамон муаррифӣ мекардем. Ҳар вақте ки мо дар бораи истиқлолият ҳарф мезанем, бемуболиға, пеши назарамон симои барҷастаи Сарвари давлатамон меояд. Маҳз Истиқлолияти давлатӣ ва дастгириҳои Ҳукумати мамлакат ва Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аст, ки ба мо – ҷавонон имкон фароҳам шуд, то барои такмили дониши худ дар донишгоҳҳои хориҷи кишвар таҳсил намуда, ба пешрафту тараққиёти кишвари азизамон саҳмгузор бошем. Инак, баргаштам ба Тоҷикистон ва мехоҳам мувофиқи ихтисосам дар пешрафти соҳаҳои дахлдор хидмат намоям.
Шерзоди САЙЁД, шаҳри Душанбе
Баёни ақида (0) Санаи нашр: 25.12.2017 №: 259 Мутолиа карданд: 1250
