ҳуқуқ
ҶИНОЯТ ва ҶАЗО
Пора ба дасти кормандони милитсия завлона зад
Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз боздошти ду корманди мақомоти корҳои дохилӣ хабар дод, ки ба гирифтани пора айбдор мешаванд.
Тибқи иттилои сомонаи агентӣ, сардори шуъбаи ҳифзи тартиботи ҷамъиятии ШВКД дар шаҳри Турсунзода майори милитсия Қамариддин Орифзода аз рӯйи маслиҳати пешакӣ бо нозири минтақавии маҳаллаи 4 - и шаҳр капитани милитсия Акбар Ҷонбобоев, бо истифода аз ваколатҳои мансабии худ, аз шаҳрванд «А» барои аз ҷавобгарӣ озод намудани бародараш 8000 сомонӣ талаб намудаанд. Кормандони милитсия аз ин маблағ 4000 сомониашро гирифта, бародари шаҳрванд «А» - ро аз боздоштгоҳи муваққатии шуъба озод ва 2000 сомонии дигар талаб кардаанд.
Бино ба гузориши манбаъ, дар натиҷаи гузарондани чорабиниҳои оперативӣ - тафтишотӣ Қамариддин Орифзода дар рӯ ба рӯи маркази дилхушии «Ҳабибӣ», воқеъ дар маҳаллаи 5 - и шаҳри Турсунзода, баъди аз шаҳрванд «А» гирифтани 2000 сомонӣ дастгир гардида, маблағи ба сифати пора гирифтааш ҳамчун далели шайъӣ гирифта шуд.
Дар робита ба ин амал нисбат ба Қамариддин Орифзода ва Акбар Ҷонбобоев бо моддаи 319 қисми 4 бандҳои «б,в» - и Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, тафтишоти пешакӣ идома дорад.
Авбошӣ оқибаташ маргу зиндон шуд
Кормандони шуъбаи Вазорати корҳои дохилӣ дар шаҳри Ҳисор бар асоси шаҳодати як ҷавони 18 - солаи сокини деҳаи Ҳуҷуми шаҳр гумонбарони қатли модарашро боздошт ва нисбат ба онҳо парвандаи ҷиноятӣ оғоз намудаанд.
Бар пояи иттилои сомонаи вазорат, ин ҷавон ба ШВКД дар шаҳри Ҳисор муроҷиат кардааст, ки зуҳри 25 декабри соли 2017 бародарон - марди 22 ва ҷавони 18 - сола, сокинони ноҳияи Шаҳринав ба манзили истиқоматиашон омада, бе ягон асос модари 64 - солаашро латукӯб намудаанд. Дар натиҷаи бардоштани ҷароҳати вазнини ҷисмонӣ модар дар ҷойи ҳодиса ба ҳалокат расидааст.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 02.01.2018 №: 1 Мутолиа карданд: 1087
