ҳуқуқ
МАВОДИ ТАРФГАРӢ. БОЗДОШТ ВА МУСОДИРАИ 400 000 ДОНА ДАР САРҲАД
Дар остонаи таҷлил аз Соли нави мелодии 2018 марзбонони тоҷик ду ҳолати воридоти ғайриқонунии маводи таркандаи пиротехникиро дар ҳаҷми калон пешгирӣ карданд.
Аз маркази матбуоти Қӯшунҳои сарҳадии Кумитаи давлатии амнияти миллии Ҷумҳурии Тоҷикистон ба “Ҷумҳурият” иттилоъ доданд, ки рӯзҳои 28 ва 31 декабри соли 2017 аз ҷониби хизматчиёни ҳарбии отрядҳои сарҳадии “Мурғоб”-и Вилояти Мухтори Кӯҳистони Бадахшон ва “Деваштич” - и вилояти Суғд воридоти ғайриқонунии 700 килограмм маводи тарфгарӣ ошкор ва мусодира шуд. Аз миқдори умумии маводи мусодирашуда, ки 400 000 донаро ташкил медиҳад, 600 килограммаш мансуб ба Отряди сарҳадии “Мурғоб” буда, хизматчиёни ҳарбӣ аз мошини таҳти идораи Қушбай Мамбедқулов, зодаи ноҳияи Мурғоб ва истиқоматкунандаи деҳаи Сармуғули вилояти Оши Ҷумҳурии Қирғизистон, пайдо кардаанд.
Қисми дигари маводи тарканда ҳангоми гузарондани корҳои оперативӣ – ҷустуҷӯӣ аз ҷониби хизматчиёни ҳарбии Отряди сарҳадии “Деваштич” ошкор ва мусодира шуда, оид ба ҳар ду ҳолат тафтишот идома дорад.
Муҳаммад Улуғхоҷаев, роҳбари маркази матбуоти Қӯшунҳои сарҳадии КДАМ, изҳор дошт, ки қаблан ҳам аз ҷониби марзбонон чандин мавриди убури ғайриқонунии марз ва кӯшиши интиқоли маводи тарфгарӣ ошкору пешгирӣ шуда буд. Вале пешгирии ин ду ҳолат аз нигоҳи ҳаҷми маводи тарканда дар соли 2017 бесобиқа буд.
Зарфи чанд соли охир чораҳои пешгирӣ ҷиҳати воридот ва истифодаи маводи тарфгарӣ пурзӯр гардида, ҳамзамон дар Кодекси ҷиноятии Ҷумҳурии Тоҷикистон (моддаи 1991) барои ғайриқонунӣ ба ҳудуди ҷумҳурӣ ворид намудан, истеҳсол кардан, нигоҳ доштан, фурӯхтан ва ба соҳибияти каси дигар додани чунин мавод ҷавобгарӣ пешбинӣ шудааст.
Ф.ҶУМЪАЕВ, “Ҷумҳурият”
Баёни ақида (0) Санаи нашр: 03.02.2018 №: 2 Мутолиа карданд: 1081