порлумон
ИМТИЁЗ БА ВОРИДОТИ ҲАВОПАЙМО ВА ЛОКОМОТИВУ ВАГОНҲО
Соли 2018 ҷиҳати навсозии техникии Ҷамъияти саҳомии кушодаи «Тоҷик Эйр», Корхонаи воҳиди давлатии «Роҳи оҳани Тоҷикистон» ва баланд бардоштани сатҳу сифати хизматрасонӣ ба мусофирон воридоти ҳавопаймоҳо, локомотивҳо ва вагонҳои замонавии мусофиркашонӣ аз пардохти андоз аз арзиши иловашуда ва боҷи гумрукӣ озод карда мешаванд.
Бо ҳамин мазмун дар ҷаласаи Маҷлиси намояндагони Маҷлиси Олӣ лоиҳаи Қонуни Ҷумҳурии Тоҷикистон «Оид ба ворид намудани илова ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2018» ба тасвиб расид.
Файзиддин Қаҳҳорзода, вазири молияи Ҷумҳурии Тоҷикистон, зимни баррасии он иброз дошт, ки лоиҳаи мазкур дар доираи татбиқи Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олӣ бо мақсади рушди минбаъдаи соҳаи нақлиёт, сифати хизматрасонӣ ба мусофирон ва навсозии техникии Ҷамъияти саҳомии кушодаи «Тоҷик Эйр» ва Корхонаи воҳиди давлатии «Роҳи оҳани Тоҷикистон» пешбинӣ шудааст.
Тоҳир Ҷабборзода, вакили порлумон, зикр кард, ки дар ин замина вобаста ба имтиёзҳои пешбинишуда рушди соҳаҳои нақлиёти ҳавоӣ ва роҳи оҳан дар назар дошта шуда, сатҳу сифати хизматрасонӣ ба мусофирон беҳтар мегардад, ки дар ин радиф ба кушодашавии хатсайрҳои иловагӣ бо шарикони рушд ва давлатҳои ҳамсоя ва пайдоиши даромадҳои иловагӣ ба Буҷети давлатӣ мусоидат менамояд.
М. САФАР, «Ҷумҳурият»
Баёни ақида (0) Санаи нашр: 01.02.2018 №: 25 Мутолиа карданд: 5293
