маориф
НЕРУИ ИНСОНӢ ВА НАҚШИ МУАССИРИ ПЕШВОИ МИЛЛАТ ДАР РУШДИ ОН
Моро зарур аст, ки боз ҳам зиёдтар заҳмат кашида, ба масъалаи таълиму тарбия афзалияти бештар диҳем, сатҳу сифати таълимро дар ҳамаи зинаҳо беҳтар кунем, барои таҳсилоти босифат аз тамоми имконот истифода карда, заминаҳои моддиву техникии муассисаҳои таълимиро таҳким бахшем ва самарабахшии фаъолияти онҳоро таъмин намоем.
Эмомалӣ РАҲМОН
Дар солҳои Истиқлолияти давлатии Ҷумҳурии Тоҷикистон бо дастуру ҳидоят ва ташаббусҳои Асосгузори сулҳу ваҳдати миллӣ - Пешвои миллат, Президенти кишвар муҳтарам Эмомалӣ Раҳмон мунтазам дар соҳаҳои маориф, иқтисоду иҷтимоиёт ислоҳот гузаронда шуда, рушди маориф ва илм, яъне неруи инсонӣ ба яке аз самтҳои асосӣ ва стратегии сиёсати давлатӣ табдил ёфтааст.
Соҳаи маориф яке аз нишондиҳандаҳои муҳимтарини рушди неруи инсонӣ буда, хусусияти меҳварӣ дорад. Махсусан, дар солҳои соҳибистиқлолӣ рушди он дар маркази таваҷҷуҳи Ҳукумат қарор гирифтааст. Зеро он сутуни асосии рушди устувори иқтисодиёт ба шумор меравад ва дар ташаккул додани неруи инсонӣ мавқеи бузург дорад. Солҳои охир бо дастгирии Президенти мамлакат Эмомалӣ Раҳмон соҳаи маориф ба пешравиҳои назаррас ва дастовардҳои зиёд ноил гаштааст. Шумораи муассисаҳои томактабию мактабӣ ва олии касбӣ ба маротиб зиёд шуд.
Чуноне ки аз Паёми навбатии Президенти кишвар бармеояд, Тоҷикистон аз рӯи нишондиҳандаҳои дастрасӣ ба таҳсилот, сифати таҳсилот, сармояи инсонӣ ва қобилияти рақобати он дар байни 101 кишвари ҷаҳон мақоми 54 – умро соҳиб гардидааст. Ин барои Тоҷикистони тозаистиқлол нишондиҳандаи хеле баланд аст. Дар баробари ин, Ҳукумати ҷумҳурӣ кӯшиш менамояд, ки нишондиҳандаҳои аз ин ҳам баландтарро соҳиб гардад.
Соли 2017 аз ҳисоби ҳамаи сарчашмаҳо зиёда аз 400 миллион сомонӣ ҷиҳати сохтмон ва азнавсозии муассисаҳои таълимӣ сарф гардид ва 24 ҳазор ҷойи нишаст муҳайё шуд. Соли 2018 ин раванд идома ёфта, маблағҳои буҷет ва лоиҳаҳои сармоягузорӣ ба ин самт равона карда мешаванд. Илова бар ин, бо қарори Ҳукумат “Барномаи давлатии таъмини муассисаҳои таҳсилоти умумии ҷумҳурӣ бо кабинетҳои фаннӣ ва озмоишгоҳҳои муҷаҳҳази таълимӣ барои солҳои 2018-2020” қабул гардидааст.
Асосгузори сулҳу ваҳдати миллӣ - Пешвои миллат, Президенти кишвар муҳтарам Эмомалӣ Раҳмон ҳамасола дар паёмҳои худ ва пайваста дар мулоқоту вохӯриҳо бо зиёиён таъкид менамоянд: “Миллате, ки ба илму дониш ва фарҳангу маънавиёт арҷ мегузорад, миллати ояндадор ва тавонову соҳибтамаддун аст”. Инчунин, таъкид мекунанд: “Агар мо хоҳем, ки давлатамон пешрафтаву неруманд ва ҷомеаи кишварамон осудаву мутамаддин бошад, коре кунем, ки фарзандонамон босаводу донишманд бошанд, дастовардҳои навини илму технологияҳои инноватсиониро аз худ намоянд”. Аз ин рӯ, ҷалби ҳар чи бештари ҷавонон ба илмомӯзӣ, азхудкунии технологияҳои иттилоотиву коммуникатсионӣ, беҳтар намудани сатҳу сифати таълим дар мактабҳо муҳиму аввалиндараҷаанд.
Муҳаббат ПИРИЕВА,
омӯзгори гимназияи № 74 - и шаҳри Душанбе
Баёни ақида (0) Санаи нашр: 01.02.2018 №: 25 Мутолиа карданд: 1193
