маориф
БА БОВАРӢ САЗОВОР БОШЕМ!
Маориф яке аз самтҳои афзалиятноки сиёсати давлат ба ҳисоб меравад. Аз ин ҷост, ки ба рушду нумӯи он, бахусус сохтмони бинои нави муассисаҳои таҳсилоти миёнаи умумӣ ва бо технологияҳои муосир муҷаҳҳаз намудани онҳо, диққати ҳамешагӣ зоҳир мегардад.
Аз оғози Истиқлолияти давлатӣ Ҳукумати Ҷумҳурии Тоҷикистон рушди соҳаи маорифро яке аз самтҳои афзалиятноки сиёсати иҷтимоии худ эълон карда, бо мақсади баланд бардоштани сифати таълиму тарбия ва таҳкими заминаҳои моддиву техникии он, доир ба афзун гардондани маблағгузорӣ ва таъмиру тармим, навсозӣ ва барқарорсозии биноҳои таълимӣ ва хобгоҳҳои муассисаҳои таълимӣ тадбирҳои зиёдеро амалӣ карда истодааст.
Ин муносибат омӯзгоронро водор месозад, ки тамоми имконот ва неруи зеҳниашонро дар роҳи таъмини сифати баланди таҳсилот, боло бурдани сатҳи дониш ва таълиму тарбияи насли наврас равона созанд.
Бар ивази ғамхориҳои Сарвари давлат имрӯз ҷавонон ҷиҳати омӯзиши забонҳои хориҷӣ, истифодаи васеи технологияҳои иттилоотиву коммуникатсионӣ ҷаҳд намуда, барои соҳиби касбу ҳунарҳои замонавӣ гардидан, пайваста кӯшиш ба харҷ медиҳанд.
Омӯзгор дар раванди таълиму тарбия баробари падару модар ва шахсоне, ки онҳоро иваз мекунанд, нақши асосӣ дорад ва ҳамчун роҳнамои маънавӣ барои ба камол расондани насли шоистаи даврон масъул аст.
Масъалаи баланд бардоштани сатҳи касбии омӯзгорон ба тарбияи насли наврас иртиботи мустақим дошта, дар рӯҳияи ватандӯстиву инсонпарварӣ ва худогоҳиву худшиносӣ ба воя расондани онҳо ниҳоят муҳим мебошад. Болоравии сифати таълиму тарбия бошад, аз ҷумлаи ҳадафҳои асосии стратегии давлат дар соҳаи маориф маҳсуб меёбад. Паёми навбатии Президенти Ҷумҳурии Тоҷикистон вазифаҳои мо - аҳли маорифро барои боз ҳам баланд бардоштани сифати таълиму тарбия, тайёр намудани мутахассисони шоистаи даврон муайяну мушаххас менамояд. Бинобар ин, мо - омӯзгорон барои татбиқи амалии нуктаҳои Паём аз таҳти дил саъю талош хоҳем кард.
Махфират ҚАЛАНДАРОВА,
омӯзгори фанни забони русии МТМУ № 13 – и шаҳри Ваҳдат
Баёни ақида (0) Санаи нашр: 07.02.2018 №: 29 Мутолиа карданд: 1267
