маориф
ДДҚ. ИҚДОМҲОЕ, КИ НАМУНАИ ИБРАТАНД
Президенти Ҷумҳурии Тоҷикистон муҳтарам Эмомалӣ Раҳмон дар Паёмашон ба Маҷлиси Олии кишвар рушди инсонро аз се омил вобаста донистанд: дастрасӣ ба таҳсилот, тандурустӣ ва зиндагии шоиста.
Донишгоҳи давлатии Қӯрғонтеппа бо ин мақсад корро аз боло бурдани маош оғоз намуд. Ин амал ба боло бурдани неруи зеҳнию ақлии устодони донишгоҳ равона гардида, ба баланд бардоштани сатҳу сифати таълим оварда марасонад. Ҷиҳати дастгирии иҷтимоии кормандону донишҷӯёни ятиму бепарастор низ корҳои зиёде ба сомон расонда шуд. Беш аз 100 донишҷӯи бепарастор аз пардохти маблағи шартнома аз 50 то 100 дарсад озод гардиданд. Ба маъюбон низ ҳамин имтиёзҳо дода шуд. Давра ба давра ба мактаб - интернати ноҳияи Ҷалолиддини Балхӣ ҳам кумак расонда мешавад.
Дар донишгоҳ 10 кафедра ва 1 факултаи нав таъсис дода шуд. Онҳо аллакай бо базаи моддӣ - техникӣ, синфхонаҳои компютерӣ, лаборатория ва таҷҳизоти зарурӣ таъмин гардиданд. Факултаи нав унвони “Сиёсат ва идораи давлат” – ро гирифт.
Боиси ифтихори ҳайати устодону омӯзгорони донишгоҳ мебошад, ки нашрияи “Паёми донишгоҳ” ба феҳристи нашрияҳои тақризшавандаи Комиссияи олии аттестатсионии Федератсияи Русия шомил шуд. Барои унвонҷӯён ин рӯйдоди фараҳбахш аст. Соли 2018 силсилаи фанҳои дақиқ низ ба ин феҳрист шомил хоҳанд шуд. То кунун аз рӯйи ихтисоси математикаю физика ва информатика ба шӯрои олии аттестатсионӣ иҷозати фаъолият дода шуд. Дар назар аст, ки шӯроҳои дигари илмӣ рӯйи кор оянд. Имсол дар назар аст, ки беш аз 20 рисолаи докторию номзадӣ дифоъ карда шавад. Умуман, устодони донишгоҳ беш аз 50 рисолаи барои дифоъ тайёр доранд.
Аз 1 январ ба профессорон барои як воҳиди корӣ беш аз 4 ҳазор сомонӣ маош дода мешавад. Ҳоло дар донишгоҳ 14 профессор ва зиёда аз 100 номзади илм фаъолият доранд.
Мутаассифона, дар масъалаи бо ҷойи кор таъмин намудани хатмкунандагон мушкилӣ доранд. Соли 2016 як кас ва соли 2017 ҳашт кас аз ҳисоби донишҷӯёни фориғултаҳсил ба ҷойи кор ҳозир нашуданд. Аз чор кас маблағи таҳсил ситонда шуд. Парвандаи чор нафар барои баррасӣ ба суд ирсол гардидааст.
Зокири ҲАСАН, “Ҷумҳурият”
Баёни ақида (0) Санаи нашр: 12.02.2018 №: 32 Мутолиа карданд: 1114
