ҳуқуқ
МОРАТОРИЙ. ФАЗОИ ШАФФОФУ МУСОИД БАРОИ СОҲИБКОРИВУ САРМОЯГУЗОРӢ
Дар асоси Фармони Президенти Ҷумҳурии Тоҷикистон аз 16 январи соли 2017 таҳти № 990 Дар бораи эълон намудани мораторий ба ҳама намуди санҷишҳои фаъолияти субъектҳои соҳибкорӣ дар соҳаҳои истеҳсолӣ дар ҷаласаи Маҷлиси намояндагони Маҷлиси Олии Ҷумҳурии Тоҷикистон лоиҳаи Қонуни Ҷумҳурии Тоҷикистон «Дар бораи мораторий ба санҷишҳои фаъолияти субъектҳои соҳибкорӣ дар соҳаҳои истеҳсолӣ» ба тасвиб расид.
Фаррух Ҳамрализода, раиси Кумитаи давлатии сармоягузорӣ ва идораи амволи давлатӣ, зимни баррасии лоиҳаи қонуни мазкур изҳор дошт, ки он асосҳои ҳуқуқии татбиқи мораторий ба санҷишҳои фаъолияти субъектҳои соҳибкорӣ дар соҳаҳои истеҳсолиро муқаррар карда, ба ҳифзи ҳуқуқу манфиатҳои қонунии шаҳрвандон мусоидат мекунад. Мораторий ба санҷишҳо, ҳамчун муваққатан боздоштани қисми муайяни ваколатҳои дар асоси лоиҳаи пешниҳодшаванда ва ё дигар санадҳои меъёрии ҳуқуқии муқарраршудаи мақомоти ваколатдори давлатии санҷишӣ вобаста ба санҷишҳои фаъолияти субъектҳои соҳибкорӣ мебошад. Субъекти соҳибкорӣ дар соҳаи истеҳсолӣ шахси ҳуқуқӣ ё соҳибкори инфиродие ба шумор меравад, ки ба қайди давлатӣ гирифта шуда, ба истеҳсоли молу маҳсулот машғул мебошад.
Ба гуфтаи раиси кумита, дар лоиҳа меъёрҳое муайян карда шудааст, ки дар ҳолатҳои алоҳидаи истисноӣ гузарондани санҷишҳо иҷозат дода мешавад. Бинобар ин, санҷишҳои фаъолияти субъектҳои соҳибкорӣ дар соҳаҳои истеҳсолӣ оид ба иҷро намудани талаботи санадҳои меъёрии ҳуқуқӣ бо огоҳондани шӯрои мазкур санҷишҳои нақшавии Агентии назорати давлатии молиявӣ ва мубориза бо коррупсияи Ҷумҳурии Тоҷикистон, Бонки миллии Тоҷикистон, Палатаи ҳисоби Ҷумҳурии Тоҷикистон, Прокуратураи генералии Ҷумҳурии Тоҷикистон ва мақоми ваколатдор дар соҳаи андоз гузаронда мешавад.
Фаррух Ҳамрализода зикр кард, ки мақсади лоиҳаи қонуни мазкур дастгирии давлатии соҳибкории истеҳсолӣ, таъмини барномаҳои қабулшудаи давлатӣ дар самти истеҳсоли маҳсулоти воридотивазкунанда, ташкили ҷойҳои кории нав, таҳкими иқтидори саноатию содиротии ҷумҳурӣ, бартараф намудани санҷишҳои беасосу такрорӣ ва фароҳам овардани фазои шаффофу мусоид барои соҳибкориву сармоягузорӣ мебошад.
Мунаввари САФАР, “Ҷумҳурият”
Баёни ақида (0) Санаи нашр: 13.02.2018 №: 33 Мутолиа карданд: 1140