ҳуқуқ
НОБОЛИҒОН. ЧАРО КОМИССИЯҲОИ ҲИФЗИ ҲУҚУҚ ВАЗИФАҲОИ АСОСИИ ХУДРО ИҶРО НАМЕКУНАНД?
Фармони Президенти Ҷумҳурии Тоҷикистон «Дар бораи тадбирҳои иловагӣ оид ба иҷрои Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» таҳти № 835 аз 8 феврали соли 2017 ба тасвиб расид, ки он таъмини иҷрои ҳар як сархат, қисм ва моддаҳои қонунро аз ҷониби вазорату кумитаҳо, мақомоти иҷроияи маҳаллии ҳокимияти давлатӣ, мақомоти худидоракунии шаҳрак ва деҳот вобаста ба самти фаъолияташон ба таври мушаххас муайян намудааст.
Бо назардошти нақш ва аҳамияти муҳим доштани Қонуни Ҷумҳурии Тоҷикистон "Дар бораи масъулияти падару модар дар таълиму тарбияи фарзанд" Шоҳ Абдулло, муовини сардори Раёсати назорати иҷрои қонунҳо оид ба ноболиғон ва ҷавонони Прокуратураи генералии Ҷумҳурии Тоҷикистон, зимни суҳбат иброз дошт, ки соли сипаришуда 211 санҷиш гузаронда шуда, оид ба иҷрои талаботи қонуни мазкур, ҷиҳати бартарафсозии қонунвайронкуниҳои ҷойдошта, сабабу шароитҳои мусоидаткарда, 3739 санади эътиноии прокурорӣ, аз ҷумла 214 амр, 122 эътироз, 277 пешниҳод ирсол гардид.
Дар рафти санҷиши гузарондаи прокуратураи шаҳри Хуҷанд муайян шудааст, ки ноболиғон Ғолибҷон ва Парвиз Собировҳо, хонандагони синфҳои 9 ва 4 МТМУ №16, аз бемасъулиятии падару модарашон истифода намуда, 182 соат дар дарсҳо иштирок накарда, ба оворагардӣ ва дигар корҳои берун аз таълим машғул шудаанд. Оид ба ин ҳолат нисбат ба волидайни ноболиғон бо моддаи 90 - и Кодекси ҳуқуқвайронкунии мурофиавии Ҷумҳурии Тоҷикистон парвандаи ҳуқуқвайронкунии маъмурӣ оғоз ва ба суд ирсол шуд.
Тибқи сархати 3 моддаи 8-и Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд” падару модар уҳдадоранд, ки ба тарбия фаро гирифтани фарзандро таъмин намуда, барои ҳифзи саломатӣ, ташаккули ҷисмонӣ, маънавӣ ва ахлоқии фарзанд шароит муҳайё намоянд.
Мутаассифона, сокини шаҳри Панҷакент Қ. Эгамов хилофи ин талаботи қонун амал намуда, муддати тӯлонӣ, зиёда аз 24 моҳ қасдан барои ҳифзи саломатӣ ва ташаккули ҷисмонии фарзандони хурдсолаш Абдулло ва Нигина шароит фароҳам наоварда, аз таъминоти моддии фарзандони ноболиғаш саркашӣ намудааст. Прокурори шаҳри Панҷакент 4 декабри соли 2017 нисбат ба Қ. Эгамов бо моддаи 177 Кодекси ҷиноятии Ҷумҳурии Тоҷикистон парвандаи ҷиноятӣ оғоз намуд.
Айнан ҳамин тавр, барои барқасдона саркашӣ намудан аз таъмини фарзандон бо моддаи 177 Кодекси ҷиноятӣ 452 парвандаи ҷиноятӣ оғоз карда шудааст.
Таҳлилҳо собит намуданд, ки новобаста аз чораҳои андешидашуда фаъолияти сохторҳои ваколатдори мақомоти иҷроияи маҳаллии ҳокимияти давлатӣ, раёсату шуъбаҳои маориф, масъулони муассисаҳои таълимӣ, комиссияҳо оид ба ҳуқуқи кӯдак ва маҷлисҳои вакилони шаҳру ноҳияҳо дар ин самт ҷавобгӯи талабот набуда, ҳолатҳои ошкоршуда дар сатҳи лозима ба роҳ монда нашудани ташкили кор ва аз набудани назорати ҷорӣ дар ин самт шаҳодат медиҳанд.
Назар ба гуфтаи Ш. Абдулло, комиссияҳо оид ба ҳуқуқи кӯдаки аксар шаҳру ноҳияҳо фаъолияти худро танҳо бо баррасии маводи алоҳида нисбат ба ноболиғони қонунвайронкунанда, ки ба унвони онҳо аз мақомоти ҳифзи ҳуқуқ ворид шудаанд, маҳдуд гардонда, вазифаҳои асосии худро ҷиҳати ҳифзи ҳуқуқи конститутсионии кӯдак, расондани кумак ба кӯдакон дар барқароркунии ҳуқуқи вайроншуда, ташкили назорат ҷиҳати ба кӯдак фароҳам овардани шароитҳои муносиби нигоҳубин, тарбия, таълим, ҳифзи саломатӣ, таъминоти иҷтимоӣ ва ғайра, ки ба беназорат ва бесаробон мондани ноболиғон мусоидат намудаанд, иҷро намекунанд.
Мунаввари САФАР, “Ҷумҳурият”
Баёни ақида (0) Санаи нашр: 21.02.2018 №: 39 Мутолиа карданд: 1223
