порлумон
КОНВЕНСИЯИ СҲШ МУҚОВИМАТ АЛАЙҲИ ЭКСТРЕМИЗМРО ПУРЗӮРТАР МЕГАРДОНАД
Мансурҷон Умаров, муовини якуми раиси Кумитаи давлатии амнияти миллии Ҷумҳурии Тоҷикистон, зимни баррасии Конвенсияи Созмони Ҳамкории Шанхай оид ба муқовимат ба экстремизм (ифротгароӣ) дар ҷаласаи Маҷлиси намояндагони Маҷлиси Олӣ иброз дошт, ки он ба мақсади фароҳам овардани заминаи ҳуқуқӣ барои ҳамкории давлатҳои аъзои Созмони Ҳамкории Шанхай аз тарафи мутахассисони мақомоти ваколатдори давлатҳо дар доираи сохтори минтақавии зиддитеррористии ин созмон таҳия гардидааст.
Конвенсияи мазкур ба ҳифзи ҳуқуқи инсон ва шаҳрванд, асосҳои сохти конститутсионӣ, таъмини тамомияти арзӣ ва амнияти миллӣ, ошкорсозӣ, огоҳонӣ ва пешгирӣ намудани экстремизм, бартараф намудани таъсири он ва, инчунин, ошкору рафъ намудани сабаб ва ҳолатҳое, ки барои амалисозии он мусоидат кардаанд, равона карда шудааст. Ин ҳуҷҷат барои давлатҳои аъзо мафҳумҳои ягонаи экстремизм, амали экстремистӣ, маблағгузории экстремизм, маводи экстремистӣ ва муқовимат ба экстремизмро пешбинӣ намуда, онҳоро барои қабули санадҳои меъёрии ҳуқуқии дахлдор дар сатҳи миллӣ уҳдадор месозад. Ҳамчунин, тартиби ҳамкории мақомоти ваколатдори давлатҳои аъзоро вобаста ба ошкор, пешгирӣ ва қайд намудани фаъолияти экстремистӣ ба танзим дароварда, истифодаи қаламрави як давлатро барои амалӣ намудани фаъолияти экстремистӣ ба муқобили дигар давлат манъ менамояд. Санади мазкур шароит фароҳам меорад, ки мақомоти салоҳиятдори давлатҳои аъзо амалиёти муштарак гузаронда, кормандони худро ба ҳудуди давлатҳои якдигар, ҷиҳати иштирок дар амалӣ намудани чорабиниҳои оперативӣ - ҷустуҷӯӣ ва ҳаракатҳои тафтишотӣ сафарбар намоянд.
Таъкид шуд, ки Конвенсияи Созмони Ҳамкории Шанхай оид ба муқовимат ба экстремизм ба Конститутсияи Ҷумҳурии Тоҷикистон ва дигар санадҳои меъёрии ҳуқуқӣ мухолифат надорад.
Мунаввари САФАР,
«Ҷумҳурият»
Баёни ақида (0) Санаи нашр: 22.02.2018 №: 40 Мутолиа карданд: 5186
