порлумон
ДАСТГИРИИ ИҶТИМОӢ. ШАРТҲОИ ПАРДОХТИ КУМАКПУЛӢ БАРОИ БЕКОРӢ МУАЙЯН ШУД
Дар сиёсати иҷтимоии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон рушди низоми ҳифзи иҷтимоии аҳолӣ, таъмини саривақтии нафақаву кумакпулиҳои иҷтимоӣ ва дастгирии иҷтимоии табақаҳои ниёзманди аҳолӣ мавқеи махсус дошта, пайваста дар ин самт тадбирҳои зарурӣ андешида мешаванд.
Ин нукта зимни тавзеҳи лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи мусоидат ба шуғли аҳолӣ» аз ҷониби Сафаралӣ Наҷмуддинов, директори Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон, ба вакилони порлумон баён шуд. Лоиҳаи мазкур дар доираи идомаи ислоҳоти соҳа ва бо мақсади мутобиқ намудани шартҳои пардохти кумакпулӣ барои бекорӣ ба принсипҳои суғуртавӣ таҳия гардидааст.
Мутобиқи Қонуни Ҷумҳурии Тоҷикистон «Дар бораи суғуртаи давлатии иҷтимоӣ» кумакпулӣ барои бекорӣ ҳамчун як намуди кумакпулии иҷтимоие, ки аз низоми суғуртаи давлатии иҷтимоӣ бармеояд, бо тартиби муқаррарнамудаи Қонуни Ҷумҳурии Тоҷикистон «Дар бораи мусоидат ба шуғли аҳолӣ» таъйин ва пардохт мешавад.
Мувофиқи қонуни мазкур, барои гирифтани кумакпулӣ барои бекорӣ шаҳрвандони бекоре ҳуқуқ доранд, ки дар давоми 3 соли охири пеш аз муроҷиат на камтар аз 18 моҳ собиқаи корӣ дошта бошанд ва ҳатман аз музди меҳнати ин давраи фаъолияти онҳо суғуртаи давлатии иҷтимоӣ пардохт шуда бошад. Яъне, қонуни зикршуда вобаста аз принсипҳои суғуртавӣ меъёри камтарини собиқаи кориро барои кумакпулӣ барои бекорӣ муайян намудааст.
Сафаралӣ Наҷмуддинов зикр кард, ки барои тақвияти назорати истифодаи мақсаднок ва суроғавии маблағҳои буҷети суғуртаи иҷтимоӣ ва нафақа, ки барои ҳифзи иҷтимоии шаҳрвандони муваққатан бекор равона мешаванд ва пешгирии омилҳои коррупсионӣ дар истифодаи ин маблағҳо ба моддаи 16 Қонуни Ҷумҳурии Тоҷикистон «Дар бораи мусоидат ба шуғли аҳолӣ» қисми нав ворид шуд, ки чунин механизми мукаммали ҳисоботдиҳӣ ва назорати доимии маблағҳои зикршуда дар муқаррароти қонуни амалкунанда пешбинӣ нашудааст.
Лоиҳаи қонуни пешниҳодшуда ба мукаммалсозии низоми идоракунии молиявии маблағҳои Буҷети давлатӣ ва самаранокии иҷрои чорабиниҳои Барномаи мусоидат ба шуғли аҳолӣ равона гардидааст.
Мунаввари САФАР,
«Ҷумҳурият»
Баёни ақида (0) Санаи нашр: 27.02.2018 №: 44 Мутолиа карданд: 5398
