номаҳо
ЧАРО ҲУКМИ СУД ИҶРО НАМЕШАВАД?
Таъмини волоияти қонун, баробарии иҷтимоӣ, адолати судӣ ва таҳкими фаъолияти мақомоти судӣ аз масъалаҳоест, ки ҳамеша дар меҳвари таваҷҷуҳи давлату Ҳукумат қарор доранд. Президенти маҳбуби кишвар 22 декабри соли 2016 зимни ироаи Паём ба Маҷлиси Олии мамлакат аз сари вақт иҷро нашудани қарорҳои судӣ изҳори нигаронӣ карда, ба Вазорати адлия, Суди Олӣ, Суди Олии иқтисодӣ ва Прокуратураи генералии Ҷумҳурии Тоҷикистон дастур доданд, ки бо назардошти таҷрибаи пешқадам механизми самараноки таъмини иҷрои қарорҳои судӣ ва чораҳоро ҷиҳати таъмини фаъолияти иҷрочиёни суд таҳия ва пешниҳод намоянд.
Мутаассифона, то ҳол ба пуррагӣ иҷро нашудани қарорҳои судӣ дар ҷомеа вуҷуд доранд, ки ман инро дар таҷрибаи худ дидам. Ҳанӯз 15 ноябри соли 2014 дар Маркази савдои ҶДММ «Сино» ва «Баҳор» - и шаҳри Хуҷанд сӯхтор ба амал омада, хисороти зиёдеро ба бор овард. Дар баробари дигар мағозаҳои фурӯши молу коло фурӯшгоҳи ба ман тааллуқдошта низ оташ гирифта, молу амволам, ки қисмати зиёдаш ба тариқи қарзи бонкӣ гирифта шуда буд, сӯхта нобуд шуд.
Мо барои барқарор намудани зарари воридшуда аз ҳисоби моликони маркази савдо ба суд муроҷиат кардем. Ин масъаларо дар бинои суди шаҳри Хуҷанд суди ноҳияи Ашт баррасӣ намуда, санаи 27 августи соли 2015 қарор дар бораи рӯёндани зарари ба ман расидаро қабул намуд. Вале бо гузашти ду сол ҳанӯз ҳам қарори суд иҷро нашуда, аз маблағи умумии таъйиншуда, ҳамагӣ 16 дарсадашро гирифтаму халос. Борҳо ба мақомоти суд ва дигар ниҳодҳои дахлдор муроҷиат кардам, вале натиҷае ба даст наомад. Аз ин рӯ, қарор додам, ки тавассути рӯзномаи бонуфузи «Ҷумҳурият» арзамро ба мақомоти салоҳиятдори давлатӣ расонам, ба умеде, ки мисли дигар муроҷиаткунандагон ба мушкили ман ҳам расидагӣ сурат гирад.
Маърифатхон ХОЛМАТОВА,
сокини шаҳри Хуҷанд
Баёни ақида (0) Санаи нашр: 05.02.2018 №: 48 Мутолиа карданд: 1486
