ҳуқуқ
ҲУҚУҚИ ИСТЕЪМОЛКУНАНДА. ТАДБИРҲОИ ВИЖАИ ҲИМОЯ
Бархе истеъмолкунандагон аз сабаби надонистани ҳуқуқҳои худ дар мағозаю бозор ҳангоми харид ба иштибоҳ роҳ дода, фиреб мехӯранд. Аз ин рӯ, баъзан моли харидашуда нуқсдор мебарояд. Надонистани ҳуқуқҳои хеш ҳамчун истеъмолкунанда боиси ҳимоя карда натавонистани манфиатҳоямон мегардад.
Ҷиҳати таъмини ҳимояи ҳуқуқҳои истеъмолкунанда дар партави дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон корҳои зиёде ба сомон расонда шуданд. 15 майи соли 1997 Қонуни Ҷумҳурии Тоҷикистон «Дар бораи ҳимояи ҳуқуқи истеъмолкунандагон» қабул гардид, ки он аз 9 декабри соли 2004 дар таҳрири нав мавриди амал қарор гирифт. Қонуни мазкур муносибатҳои истеъмолкунанда, истеҳсолкунанда, иҷрокунанда ва фурӯшандагонро ҳангоми савдои мол ва хизматрасонӣ ба танзим медарорад. Ду сол пеш ин қонун бо тағйиру иловаҳои нав мукаммалтар гардид. Тибқи ин қонун, истеъмолкунандагон ба ҳифзи саломатӣ аз зарари мол, бехатарии мол, ҳифзи манфиатҳои иқтисодӣ, маълумот дар бораи мол ва муомилоти он, муҳити зист, изҳори назари худ оид ба мол ва муроҷиат ба суду дигар мақомоти ваколатдори давлатӣ ҳуқуқ доранд. Масалан, тибқи моддаи 20 ҳамин қонун нуқсонҳои ошкоршудаи моли харидорро истеҳсолкунанда ё фурӯшанда бояд бетаъхир бартараф созад. Муҳлати ниҳоии бартарафсозии нуқсонҳо 14 рӯзи корӣ баъд аз шикояти истеъмолкунанда муқаррар гардидааст.
- Ҳолатҳои ҳуқуқҳои истеъмолкунандаро поймол кардан хеле зиёданд. Аз ин лиҳоз, донистани ҳуқуқҳои худ танҳо ба манфиати иқтисодии шаҳрвандон мебошад. Давоми соли 2017 ба суроғаи шуъбаи мо муроҷиатҳои зиёди хаттӣ ва шифоҳӣ дохил гардиданд. Аз 20 аризаи хаттӣ баррасии 17 адад ба манфиати истеъмолкунандагон анҷом ёфт, - гуфт зимни суҳбат Дилшод Қурбонов, сардори шуъбаи Хадамоти зиддиинҳисории назди Ҳукумати Ҷумҳурии Тоҷикистон дар шаҳри Душанбе.
Дар хадамот барои дар сатҳи баланди ташкилӣ гузарондани ҷашни Рӯзи ҷаҳонии ҳифзи ҳуқуқи истеъмолкунандагон нақшаи чорабиниҳо тартиб дода шудааст ва тибқи он бо хонандагону донишҷӯён, сокинони маҳаллаҳо ва соҳибкорон вохӯрию ҳамоишҳо гузаронда мешаванд.
Убайдулло РАҲИМОВ, рӯзноманигор
Баёни ақида (0) Санаи нашр: 15.03.2018 №: 55 Мутолиа карданд: 1254
