ҳуқуқ
ХАТЛОН НАХУСТМАРОСИМИ ГУСЕЛИ ҶАВОНОН БА ХИЗМАТИ ҲАРБӢ
Дар асоси Фармони Президенти Ҷумҳурии Тоҷикистон аз 12 марти соли 2018 «Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1991 – 2000 Ҷумҳурии Тоҷикистон ба хизмати ҳарбӣ» дар тамоми шаҳру навоҳии мамлакат даъвати баҳории ҷавонон ба хизмати ҳарбӣ ҷараён дорад. Дар оғози ин маъракаи муҳими сиёсӣ дар вилояти Хатлон маросими гусели аввалин гурӯҳи даъватшавандагон баргузор гашт.
Тавре Фақер Саъдуллоев, мудири шуъбаи иттилоотию таҳлилии дастгоҳи раиси вилоят, ба «Ҷумҳурият» иттилоъ дод, зимни гусели даъватшавандагон ба сафи Қувваҳои Мусаллаҳи мамлакат дар назди Театри мусиқи-мазҳакавии ба номи Ато Муҳаммадҷонови шаҳри Бохтар бо иштироки раиси вилояти Хатлон Давлатшоҳ Гулмаҳмадзода чорабинии вижа баргузор гардид.
Давлатшоҳ Гулмаҳмадзода иброз дошт, ки дар даврони соҳибистиқлолӣ Қувваҳои Мусаллаҳи мамлакат худро чун ҳомии кишвар ва амнияту оромии ҷомеа бо неруи тавоно рисолати касбии худро дар назди халқу Ватан иҷро менамояд.
- Хизмат ба Ватан шарафи бузург ва вазифаи муқаддаси ҳар як фарди худогоҳу миллатдӯст мебошад. Хизматчиёни ҳарбӣ бояд хуб дарк намоянд, ки садоқат ба Ватан-Модар дар пос доштани арзишҳои миллӣ ва аз тамоми манфиатҳо боло гузоштани манфиати давлату миллат зоҳир мегардад, - афзуд раиси вилоят.
Гуфта шуд, ки имрӯз маҳз шумо - ҷавонони соҳибиродаи Ватанро мо меросбарони гузаштагони шуҷои худ меҳисобем ва барои шумо шарафи бузург аст, ки ҳимояи марзу буми Тоҷикистони азизро ба шумо бовар мекунанд. Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон ба неруи созанда ва бузурги ҷавонони саодатманд ва ҳимоятгарони хоки аҷдодӣ бовар дошта, амнияту субот ва пешрафту шукуфоии кишварро дар ҳисси баланди меҳанпарастӣ ва бозувони қавии шумо мебинанд. Итминон дорем, ки қарзи худро бо сари баланд дар назди Модар - Ватан адо хоҳед намуд.
Дар ҷараёни ҷамъомад ҷавонон аз дастгириҳои пайвастаи Ҳукумати кишвар ва Пешвои миллат изҳори сипос намуда, омодагии худро баҳри хизмат ба халқу Ватан иброз намуданд.
Дар қисмати дигари чорабинӣ ҳунармандон барномаи ҷолиби таҳиянамудаи худро, ки аз суруду таронаҳои ватандӯстона иборат буд, намоиш доданд.
Кароматулло РАҲМАТОВ, «Ҷумҳурият»
Баёни ақида (0) Санаи нашр: 06.04.2018 №: 69 Мутолиа карданд: 1044
