ҳуқуқ
ПУРСИШ ва ПОСУХ
Ба саволҳо Ф. Тоиров, узви Иттифоқи адвокатҳои Ҷумҳурии Тоҷикистон ва А. Садшоева, ҳуқуқшиноси Бюрои давлатии ҳуқуқии шаҳри Хоруғ, ҷавоб доданд. Зимнан, агар хонандагони гиромӣ пурсише доранд, метавонанд бо телефони 238 - 54 -16 ба мо муроҷиат намоянд.
- Ман дар як манзил бо модарам ва бародарам зиндагӣ мекардем. Ба модарам танҳо ман парасторӣ мекардам ва тамоми хароҷоти хонаро ба уҳда доштам. Аз рӯзи вафоти модарам як сол сипарӣ шуд. Масъалаи ба номи худ ҳуҷҷатгузорӣ кардани манзили истиқоматиро чӣ тавр ба роҳ монам?
А. СУЛТОНОВ, шаҳри Левакант
Агар марҳум модаратон то вафоташ манзили истиқоматиашро ба шумо ҳадя ва ё бо аҳди дигар ҳуқуқи моликиятиашро нагузаронда бошад, он гоҳ то рӯзи вафот нигоҳубин кардан, гузарондани маросимҳои дафн ва пас аз дафнӣ, пардохти хараҷотҳои хона ва ғайра ба шумо ҳуқуқи ба номи худ гузарондани хонаро намедиҳад. Яъне, шумо чун дигар фарзандон танҳо ба гирифтани ҳисса аз мероси модаратон ҳуқуқ доред. Аз ин рӯ, барои барасмиятдарории ҳиссаи худ ба идораи нотариалӣ муроҷиат менамоед ва оид ба доираи меросхӯрони дигар маълумоти заруриро ба нотариуси давлатӣ мерасонед.
* * *
- Ман оиладор шуданиам, аммо кормандони Сабти асноди ҳолати шаҳрвандӣ тавсия доданд, ки то маълумотномаи тиббӣ оид ба саломатӣ пешниҳод накунам аризаи маро қабул намекунанд. Оё ин амал дуруст аст ва барои чӣ маълумотномаи тиббӣ дар ин ҳолат зарур шумурда мешавад?
Н. ҶУМЪАЕВА, сокини ноҳияи Рӯшон
Қонунгузорӣ дар моддаи 14 - и Кодекси оилаи Ҷумҳурии Тоҷикистон яке аз ҳолатҳоеро, ки монеаи бастани ақди никоҳ мегардад, аз муоинаи тиббии ҳатмӣ нагузаштани шахсонеро, ки мехоҳанд ақди никоҳ банданд, эътироф кардааст. Дар моддаи 15 - и ҳамин кодекс дарҷ шудааст, ки шаҳрвандони Ҷумҳурии Тоҷикистон, шаҳрвандони хориҷӣ ва шахсони бешаҳрванд пеш аз бастани ақди никоҳ мутобиқи қонунгузории Ҷумҳурии Тоҷикистон дар муассисаҳои давлатии соҳаи тандурустии маҳали зист ё истиқомати доимӣ аз муоинаи тиббии ҳатмӣ ба таври ройгон мегузаранд ва онҳо бо натиҷаи муоинаи тиббии ҳатмии ҳамдигар шинос карда мешаванд. Машваратдиҳӣ оид ба тарзи ҳаёти солим, банақшагирии оила ва таъсири бемориҳо ба саломатии насл аз ҷониби муассисаҳои давлатии соҳаи тандурустии маҳали зист ё истиқоматии доимӣ мутобиқи қонунгузории Ҷумҳурии Тоҷикистон гузаронда мешавад.
Шуъбаи ҳуқуқи рӯзномаи “Ҷумҳурият”
Баёни ақида (0) Санаи нашр: 09.04.2018 №: 70 Мутолиа карданд: 1095
