маориф
ДОНИШГОҲИ ДАВЛАТИИ МОЛИЯ ВА ИҚТИСОД ТАҒЙИРОТ БА ХОТИРИ ФАРДОИ ДУРАХШОН
Пешрафти иқтисоди миллӣ дар раванди гузариш ба марҳилаи нави рушд аз мутахассисони баландпоя вобастагии калон дорад. Донишгоҳи давлатии молия ва иқтисоди Тоҷикистон барои тайёр кардани кадрҳои баландихтисос дар ин раванд саҳми чашмрас дорад.
Шукрулло Хайрзода, ректори донишгоҳ, иброз дошт, ки донишгоҳ ҳамчун зодаи даврони истиқлолият дар низоми миллии омода сохтани кадрҳои соҳаи иқтисод ва молия мавқеи мустаҳкам пайдо кардааст. Таваҷҷуҳи асосӣ ба корҳои илмӣ – тадқиқотӣ ва инноватсия равона гардидааст. Баъд аз таҷдиди назар кардани мавзӯъҳои илмӣ - тадқиқотӣ дар ин самт чанд тағйирот, ки бевосита ба ҳадафҳои стратегии кишвар, таҳқиқи масъалаҳои муҳими марбут ба иқтисодиёти миллӣ ва ба сиёсати имрӯза мутобиқ дахл доранд, дароварда мешавад, аз ҷумла дар бахши такмили асосҳои институтсионалӣ ва механизми идоракунии молия ва иқтисод дар шароити ҳамгироии минтақавӣ ва ҷаҳонишавӣ, инчунин, ҳалли проблемаҳои муҳосибӣ, омор ва таҳлили нишондиҳандаҳои рушди устувори иқтисодиёт. Моделсозии математикӣ ва технологияи иттилоотӣ дар таҳлили нишондиҳандаҳои макроиқтисодӣ яке аз масоили муҳими ба рушди иқтисодиёт мусоидаткунанда асоси омӯзиши донишҷӯён хоҳад буд. Масъалаҳои такмилдиҳӣ ва омӯзиши таҷрибаи истифодаи забонҳои хориҷӣ дар иқтисодиёт бошад, дар пешрафти соҳа тавассути густариши ҳамкорӣ байни кишварҳои хориҷа таконбахш аст. Барои ин, дар донишгоҳ дар доираи барномаи Конфутсий маркази омӯзиши забони чинӣ кушода шуд ва таълимаш ройгон аст. Иқдоми мазкур барои рушди истеҳсолот дар кишвар мусоидат мекунад.
Тавре Нурализода Амрулло Назрулло, муовини ректор оид ба таълим дар Донишгоҳи давлатии молия ва иқтисод, иттилоъ дод, чунин тағйирот баъди тасдиқи пешниҳодҳо аз ҷониби Шӯрои олимони донишгоҳ роҳандозӣ мешавад. Дар пешниҳодҳо масъалаҳои дигар низ ҳастанд, ки амалӣ гардидани онҳо барои такмили дониши беш аз ҳафт ҳазор донишҷӯ, ҳалли муаммоҳои консептуалии ҷомеаи Тоҷикистон дар шароити иқтисоди бозорӣ ва баланд бардоштани маърифати экологӣ дар роҳи гузариш ба “иқтисоди сабз” мусоидат менамоянд.
Қобили зикр аст, ки чанд рӯз пеш бо пешниҳоди Президенти мамлакат муҳтарам Эмомалӣ Раҳмон муассиса тағйири ном кард, яъне аз Донишкадаи молия ва иқтисод ба Донишгоҳи давлатии молия ва иқтисоди Тоҷикистон. Икдоми пешгирифта далели дастгирӣ ва ташаббусҳои давлату Ҳукумат ба хотири омода кардани мутахассисони баландпоя ва ба ин васила пешрафт сохтани иқтисоди миллӣ мебошад, ки армуғонест барои Рӯзи иқтисодчиён.
О. ВАФОБЕК, “Ҷумҳурият”
Баёни ақида (0) Санаи нашр: 09.04.2018 №: 70 Мутолиа карданд: 2045
