маориф
ДОНИШГОҲИ ДАВЛАТИИ ДАНҒАРА ФАРДО АЗ ИМРӮЗ БОЯД БЕҲТАР БОШАД
Донишгоҳи давлатии Данғара зодаи истиқлоли кишвар маҳсуб мешавад. Дар ин давра зарурати тайёр кардани мутахассисони ҷавобгӯи талаботи давр ба миён омад. Он дари худро ба рӯи тамоми довталабон аз манотиқи гуногуни кишвар кушод. Албатта, дар ин сурат бояд заминаҳои таълиму тарбия ва шароити зист барои муҳассилин ва устодон ба вуҷуд оварда мешуд. Алҳол дигар дар ин хусус мушкилот вуҷуд надорад.
Сарвари ин муассисаи таълимӣ Шоҳиён Нуралӣ саъю кӯшиш ба харҷ медиҳад, ки то бо истифода аз усулҳои муосир ва меъёрҳои байналмилалӣ сатҳу сифати таълимро баланд бардорад. Дар иҷрои ин кор муваффақ мебошад, чунки таҷрибаи зиёди корӣ ва роҳбарӣ дорад.
Ҷалб ва тайёр кардани мутахассисони варзидаи соҳа аз масъалаҳоест, ки дар маркази диққаташ қарор дорад. Дастовардҳои зиёду чашмрас моро бовар мебахшад, ки дар солҳои наздик донишгоҳ дар рейтинги муассисаҳои таҳсилоти олии касбии кишвар мақоми шоистаро сазовор мегардад.
Ҳайати олимон ва мутахассисон вазифадор гардидаанд, ки дар таълифи китобҳои муҳими дарсӣ, дастурҳои методӣ бештар аз пештар фаъол бошанд.
Синфхонаҳои лингофонӣ ва компютерӣ барои омӯзиши забонҳои хориҷӣ ва технологияҳои иттилоотию коммуникатсионӣ, донишҳои муосири соҳавӣ мусоидат мекунанд. Донишҷӯён ба компютерҳо ва шабакаи интернет, китобҳои таълимӣ дастрасӣ доранд.
Нисбат ба солҳои пешин ҷавонон бештар ба корҳои илмию тадқиқотӣ машғул мешаванд, балки ҷалбу вазифадор гардиданд.
Дар муассиса маҳфилҳои гуногуни илмӣ амал мекунанд.
Донишгоҳ бо дигар муассисаҳои таълимӣ ва илмию тадқиқотӣ шартонамаи ҳамкорӣ дорад.
Тадбирҳои зарурӣ андешида шудаанд, ки ояндаи наздик донишҷӯён дар озмунҳову чорабиниҳои муҳими илмӣ ширкат варзанд. Мурод аз ин ҳамкориҳо ва саъю кӯшишҳо ба таҳсил фаро гирифтани донишҷӯёни хориҷӣ ва идомаи таҳсили муҳассилони таълимгоҳ дар хориҷи кишвар аст.
«Лингвистика ва шабакаҳои телекоммуникатсионӣ» дар миёни шаш факултаи донишгоҳ факултаи навтаъсис маҳсуб мешавад. Таъсису фаъолияти чунин як факулта бори дигар собит месозад, ки масъулону мутахассион ва омӯзгорони таълимгоҳ на танҳо ҳамқадами замонанд.
Ҳамин тавр, ояндаи Донишгоҳи давлатии Данғара дурахшон мебошад. Мо бо он ва сарвараш ба чунин дастовардҳо ифтихор мекунем.
Маҳбуба Шаробова, ноҳияи Данғара
Баёни ақида (0) Санаи нашр: 10.04.2018 №: 71 Мутолиа карданд: 1117
