энергетика
ДУШАНБЕ. ЯК ТАСМИМИ МУҲИМ
Дар доираи татбиқи лоиҳаи «Беҳтаргардонии зеристгоҳҳо дар шаҳри Душанбе» низоми таъмини неруи барқ дар пойтахти мамлакат боз ҳам беҳтар хоҳад шуд.
- Агентии Япония тасмим гирифтааст, ки барои сохтани як адад зеристгоҳи барқи навъи 110-35-10 кВт дар ноҳияи Исмоили Сомонӣ бо насби ду адад трансформатори иқтидорашон 40 мегаволт - ампер ва таҷдиди зеристгоҳи барқи 110-35-10 кВт тавассути иваз намудани ду адад трансформатори иқтидорашон 25 бо трансформаторҳои иқтидорашон 40 мегаволт - ампер ва пурра иваз кардани чашмакҳои 35 ва 10 киловолт дар ноҳияи Синои шаҳри Душанбе маблағгузорӣ намояд.
Ин нуктаро Султон Раҳимзода, муовини якуми вазири энергетика ва захираҳои оби Ҷумҳурии Тоҷикистон, дар ҷаласаи Маҷлиси намояндагони Маҷлиси Олӣ зимни ташреҳи Созишномаи грантӣ оид ба лоиҳаи «Беҳтаргардонии зеристгоҳҳо дар шаҳри Душанбе» байни Ҳукумати Ҷумҳурии Тоҷикистон ва Агентии Япония оид ба ҳамкориҳои байналмилалӣ баён намуд. Тибқи ҳисоботи техникӣ арзиши лоиҳаи мазкур ба 20 миллион доллар баробар аст.
Назар ба гуфтаи муовини вазир, зеристгоҳҳои мавҷуда ҳанӯз дар солҳои 70 - уми асри гузашта сохта шуда, айни замон таҷҳизоти онҳо куҳнаву фарсуда шудаанд.
Бо сохтани зеристгоҳ дар ноҳияи Исмоили Сомонӣ шабакаи барқӣ аз серборӣ озод гардида, ҷиҳати кам шудани талафоти техникӣ ва баланд гардидани сатҳи таъмини неруи барқ заминаи хуби техникӣ гузошта мешавад. Воридоти таҷҳизоти барқӣ ва трансформаторҳо аз Япония ва кишварҳои Аврупо дар назар буда, корҳои сохтмонӣ ба зиммаи ширкатҳои ватанӣ вогузор шудааст.
Мунаввари САФАР, «Ҷумҳурият»
Баёни ақида (0) Санаи нашр: 20.04.2018 №: 79 Мутолиа карданд: 17347
