ҳуқуқ
НОБОЛИҒОН. НИГАРОНӢ АЗ АФЗОИШИ ҶИНОЯТКОРӢ
Мувофиқи таҳлили натиҷаи фаъолияти амалии мақомоти таҳқиқу тафтишот, бештари ноболиғоне, ки ҷиноят ва дигар ҳуқуқвайронкуниҳоро содир менамоянд, аз назорати падару модарон берун монда, бештари вақти худро дар марказҳои бозиҳои компютерӣ ё хизматрасонии интернетӣ ғайримақсаднок мегузаронанд, ки ба раванди таълим, тарбия ва рӯҳияи ахлоқии онҳо таъсири манфӣ мерасонад.
Ин нуктаро Абдураҳмон Аламшозода, муовини якуми вазири корҳои дохилии Ҷумҳурии Тоҷикистон, зимни баррасии лоиҳаи Қонуни Ҷумҳурии Тоҷикистон «Оид ба ворид намудани тағйироту илова ба Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» иброз дошт. Он дар асоси нақшаи чорабиниҳо оид ба дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки аз 15 феврали соли 2017 дар вохӯрӣ бо масъулону фаъолони шаҳри Душанбе баён доштанд,таҳия гардидааст. Лоиҳа ба мақсади пешгирии ҳолатҳои воридшавии ғайримақсадноки ноболиғон ба марказҳои бозиҳои компютерӣ ё хизматрасонии интернетӣ таҳия шудааст. Тибқи лоиҳа дар сархати нуҳуми моддаи 8 - и қонуни амалкунанда калимаҳои «20 - солаашонро» ба калимаҳои «18 - солаашонро» иваз карда мешавад. Зеро мувофиқи санадҳои меъёрии ҳуқуқӣ ноболиғ шахси ба синни 18 норасида эътироф меёбад. Инчунин, ба моддаи мазкур ба мазмуни зерин «аз соати 18 то соати 6 ба марказҳои пешниҳоди бозиҳои компютерӣ ё хизматрасонии интернетӣ рафтани фарзандони ноболиғи худро иҷозат надиҳанд» илова гардид, ки ин ҳам барои аз ҷониби волидон зери назорати хеш гирифтани фарзандони ноболиғ равона шудааст.
- Аз таъсири бозиҳои компютерӣ ва тамошои бозиҳо вобаста ба филмҳои хусусияти зӯроваридошта дар ҳудуди шаҳри Душанбе ҷангҳои гурӯҳӣ байни муассисаҳои таълимӣ нисбат ба ду соли қаблӣ зиёд шуда, дар 3 моҳи соли ҷорӣ ҷинояткорӣ дар байни хонандагони муассисаҳои таҳсилоти миёнаи умумӣ 40 дарсад афзоиш ёфтааст, - гуфт Абдураҳмон Аламшозода, муовини якуми вазири корҳои дохилӣ.
Мунаввари САФАР, «Ҷумҳурият»
Баёни ақида (0) Санаи нашр: 24.04.2018 №: 81 Мутолиа карданд: 972
