маориф
ҲИСОР. ҶАМЪБАСТИ МУВАФФАҚОНАИ ОЛИМПИАДА
Дар Қасри тозабунёди фарҳанги шаҳри Ҳисор вохӯрии раиси шаҳр Шарифҷон Ҷумъазода бо собиқадорони соҳаи маориф ва хонандагону донишҷӯёни болаёқат доир гардид.
Дар вохӯрӣ Абдуҷаббор Раҳмонзода, ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, Раҳматулло Мирбобоев, муовини якуми вазири маориф ва илми ҷумҳурӣ, инчунин, намояндагони соҳаҳои мухталиф ширкат варзиданд.
Абдуҷаббор Раҳмонзода аз муваффақиятҳои тайи солҳои охир ба даст омадаи соҳаи маорифи мамлакат ёдовар шуда, иброз дошт, ки рӯз ба рӯз дар шаҳри Ҳисор дастовардҳои соҳаҳои иҷтимоии шаҳр - маориф, фарҳангу тандурустӣ бештар ба чашм мерасанд.
Мавриди зикр аст, ки чанде пеш Маркази ҷумҳуриявии дарёфт ва рушди истеъдодҳои назди Вазорати маориф ва илми Ҷумҳурии Тоҷикистон даври минтақавии олимпиадаи хонандагони муассисаҳои таҳсилоти миёнаи умумии шаҳру ноҳияҳои тобеи ҷумҳуриро баргузор намуд. Олимпиада аз фанҳои ҷамъиятӣ - гуманитарӣ ва табиӣ - риёзӣ байни синфҳои 9 - 10 дар мактаби президентӣ барои хонандагони болаёқати шаҳри Ҳисор баргузор гардид. Дар олимпиадаи фаннии минтақавӣ зиёда аз 1000 хонанда иштирок намуд. Натиҷаи олимпиада нишон дод, ки хонандагони муассисаҳои таҳсилоти миёнаи умумии шаҳри Ҳисор сазовори 55 ҷой гардиданд. Дар даври минтақавии олимпиада хонандагони мактаби президентӣ барои хонандагони болаёқат дар шаҳри Ҳисор бо гирифтани 24 ҷойи ифтихорӣ (9 медали тилло, 6 медали нуқра, 9 медали биринҷӣ) байни дигар муассисаҳои таълимӣ мақоми аввалро сазовор гаштанд.
Ш. Ҷумъазода, зикр намуд, ки давоми солҳои охир мамлакати мо тавассути фаъолияти дастаҷамъона ва аҳлона дар соҳаҳои гуногуни хоҷагии халқ ба дастовардҳои беназир ноил шуда, рушду пешрафти босуръату босифати он дар ҳамаи соҳаҳо таъмин мегардад. Боиси ифтихор аст, ки таъмини зиндагии шоистаи хонандагону донишҷӯён пайваста таҳти дастгирии ҳамаҷонибаи Ҳукумати кишвар, махсусан Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дорад.
Матлубаи АБДУҚАҲҲОР, «Ҷумҳурият»
Баёни ақида (0) Санаи нашр: 24.04.2018 №: 81 Мутолиа карданд: 1075
