ҳуқуқ
ВОЛОИЯТИ ҚОНУН МУҲИМТАРИН ШАРТИ ЭЪМОРИ ҶОМЕАИ НАВИН
Бунёди давлати ҳуқуқбунёд ҳар яки моро вазифадор месозад, ки риояи ҳатмии қонун, пеш аз ҳама, меъёрҳои Конститутсияи давлатамонро таъмин намоем, зеро риояву иҷрои қонун, яъне волоияти қонун, шарти муҳимтарини эъмори ҷомеаи навин ба шумор меравад.
Эмомалӣ РАҲМОН
Кафолати муҳими таҳкими заминаҳои давлати демокративу ҳуқуқбунёд ва рушди ҷомеаи шаҳрвандӣ ин ноил шудан ба сифати баланд ва самараноки мавҷудият ва амалишавии низоми меъёрии ҳуқуқӣ, аз ҷумла қонунгузорӣ, инчунин, таъмини волоият, риоя ва эҳтироми Конститутсия ва таҳкими сохтори конститутсионӣ дар кишвар мебошад.
Тавре мусаллам аст, асоси фаъолияти мақомоти амалисозандаи адолати судии конститутсионӣ, ин ноил шудан ба қонунияти конститутсионӣ ва дар ҳудуди кишвар барпо кардани фазои ягонаи ҳуқуқӣ дар заминаи Конститутсия ба шумор меравад. Маҳз мақомоти амалисозандаи адолати судии конститутсионӣ дорои ваколати васеи назоратӣ оид ба ташаккули фазои ягонаи ҳуқуқӣ мебошад, ки хислати системавӣ ва ҳамаҷонибаро дар худ таҷассум мекунад.
Аҳамияти муҳими Суди конститутсионӣ дар он ифода меёбад, ки тавассути ҳимояи Конститутсия ин мақом фаҳмиши ягонаи Конститутсия, таъмини волоият ва ҳимояи ғояҳои бунёдии онро дар ҳама сатҳҳои ҳокимият таъмин намуда, амалишавии бомароми ҳуқуқу озодиҳои конститутсионии инсон ва шаҳрвандро тақвият мебахшад. Кафолати рушди устувори давлати демокративу ҳуқуқбунёд низ дар ҳамин ифода меёбад.
Суди конститутсионӣ дар ташаккул ва рушди конститутсионализми муосир, қонунгузории конститутсионӣ ва соҳавӣ нақши назаррас дорад, зеро ин мақом меъёри қонунро ғайриконститутсионӣ эътироф намуда, онро аз қувваи ҳуқуқӣ маҳрум месозад ва самаранокии раванди қонунэҷодкуниро баланд мебардорад.
Функсияи Суди конститутсионӣ бо ин хотима наёфта, инчунин, дар доираи қарори худ, дорои як навъ функсияи маънидодкунии конститутсионии меъёри қонунгузории соҳавӣ мебошад ва бо ин тарз талаботи қонунгузории соҳавиро ба сатҳи принсип ва арзишҳои конститутсионӣ мерасонад, ки онҳо бояд дар соҳаи дахлдори мавриди танзими ҳуқуқӣ инъикоси худро пайдо намоянд.
Табиати ҳуқуқии қарорҳои Суди конститутсионӣ, ки бинобар баамалбарории назорати конститутсионӣ қабул мешаванд, асосан бо мавқеи ҳуқуқии дар онҳо инъикосёбанда вобаста мебошанд, чунончи, маҳз дар мавқеи ҳуқуқии Суди конститутсионӣ моҳияти ҷавҳари меъёрии ҳуқуқии қарори қабулшуда инъикос мегардад.
Дар маҷмӯъ, амалишавии бомароми ҳадафҳои давлати демократӣ ва арзишҳои конститутсионӣ шаҳодати он аст, ки имрӯз дар Тоҷикистон низоми муътадили қонунгузорӣ мавҷуд буда, конститутсионализм ба таври устувор вориди ҳаёти ҷамъиятию сиёсӣ гардидааст ва исботи ин омил тарзи демократии таҳия ва қабули қонунҳо, мавҷудияти назорати конститутсионӣ, устувории меъёрҳои конститутсионӣ ва эътирофи арзишҳои волои инсонӣ ба шумор мераванд.
Даврон ҲОШИМЗОДА,
судяи Суди конститутсионии Ҷумҳурии Тоҷикистон, номзади илмҳои ҳуқуқ
Баёни ақида (0) Санаи нашр: 25.04.2018 №: 82 Мутолиа карданд: 1038
