ҳуқуқ
ТОҶИКИСТОН ВА ӮЗБЕКИСТОН. ТАСВИБИ ҲУҶҶАТҲОЕ, КИ РОБИТАҲОИ ДӮСТОНАРО ТАҚВИЯТ МЕБАХШАНД
Тасвиби созишномаҳо байни Ҳукумати Ҷумҳурии Тоҷикистон ва Ҳукумати Ҷумҳурии Ӯзбекистон оид ба фаъолияти намояндагони сарҳадӣ ва дар бораи ҳамкорӣ ҷиҳати таъмини фаъолияти сарбанди «Фарҳод», ки 25 апрел дар порлумони мамлакат сурат гирифт, ба таҳкими робитаҳои дӯстонаи ду кишвари ҳамҷавор такони нав мебахшанд.
Мансурҷон Умаров, муовини якуми раиси Кумитаи давлатии амнияти миллии Ҷумҳурии Тоҷикистон, зимни тавзеҳи Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Ӯзбекистон оид ба фаъолияти намояндагони сарҳадӣ иброз дошт, ки то ҳол фаъолияти намояндагони сарҳадии ду давлат тибқи нақшаҳои ҳарсолаи аз ҷониби фармондеҳони қӯшунҳои сарҳадии Тоҷикистону Ӯзбекистон ба имзорасида амалӣ мегардид. Ин ҳуҷҷат бо мақсади фароҳам овардани заминаи ҳуқуқии фаъолияти намояндагони сарҳади Тоҷикистону Ӯзбекистон равона гардида, тартиби фаъолият ва ҳалли баҳсҳои марзиро ба танзим медарорад. Ҳоло минтақаҳои фаъолият, аз ҷумла дар самти Тоҷикистон 7 адад ва дар самти Ӯзбекистон 11 адад гардидааст.
Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Ӯзбекистон дар бораи ҳамкорӣ ҷиҳати таъмини фаъолияти сарбанди «Фарҳод» - ро Раҳмонзода Султон, муовини якуми вазири энергетика ва захираҳои оби Ҷумҳурии Тоҷикистон, ба вакилони Маҷлиси намояндагон муаррифӣ кард. Тибқи арзёбии ӯ, фароҳам овардани заминаи ҳуқуқӣ ва ба танзим даровардани муносибатҳои ҳамкорӣ байни Ҷумҳурии Тоҷикистон ва Ҷумҳурии Ӯзбекистон дар таъмини фаъолияти сарбанди «Фарҳод» тибқи санадҳои меъёрии ҳуқуқии амалкунандаи ҷонибҳо аз ҳадафҳои созишномаи мазкур аст. Бар асоси ин ҳуҷҷат, ҷониби Ӯзбекистон дар мувофиқа бо ҷониби Тоҷикистон ҷиҳати дар ҳолати хуби корӣ нигоҳ доштани сарбанди «Фарҳод» чораҳо меандешад ва ҳамаи хароҷотро вобаста ба таъмини фаъолияти он пардохт менамояд. Зимнан, таъминоти тартиботи ҳуқуқӣ, бехатарӣ, реҷаи махсус ва ҳифзи иншоот аз ҷониби Тоҷикистон амалӣ карда мешавад. Изҳори бовар карда шуд, ки созишномаи мавриди назар барои рушди ҳамкории тарафҳо ва таҳкими робитаҳои дӯстона мусоидат менамояд.
Созишнома ба муҳлати 49 сол баста шуда, тарафҳоро дар таъмир, нигоҳдорӣ ва амнияти он муваззаф месозад.
Мунаввари САФАР,
«Ҷумҳурият»
Баёни ақида (0) Санаи нашр: 27.04.2018 №: 84 Мутолиа карданд: 1087
