ҳуқуқ
МАВОДИ МУХАДДИР. БА НАҚШИ ТОҶИКИСТОН ДАР МУБОРИЗА АЛАЙҲИ ОН ЭҲТИРОМ МЕГУЗОРАНД
14 майи соли ҷорӣ дар Вазорати корҳои хориҷии Ҷумҳурии Тоҷикистон бо иштироки намояндагони сохторҳои давлатӣ, корпуси дипломатӣ, созмонҳои байналмилалӣ ва воситаҳои ахбори омма ҷиҳати муаррифии маҷаллаи “Шарҳи вазъи маводи мухаддир дар Ҷумҳурии Тоҷикистон дар соли 2017” нишасти хосса баргузор шуд.
Зимни чорабинӣ Исматулло Насредин, муовини вазири корҳои хориҷии Ҷумҳурии Тоҷикистон, Шерхон Салимзода, директори Агентии назорати маводи нашъаовари назди Президенти Ҷумҳурии Тоҷикистон ва Ашита Миттал, роҳбари Дафтари минтақавии Раёсати СММ оид ба маводи мухаддир ва ҷинояткорӣ (UNODC) суханронӣ намуданд.
Маҷаллаи “Шарҳи вазъи маводи мухаддир дар Ҷумҳурии Тоҷикистон дар соли 2017” - ро Шамшод Хушвахтзода, сардори ситоди Агентии назорати маводи нашъаовар, муаррифӣ намуда, перомуни ҳамкории мақомоти ҳифзи ҳуқуқи кишвар бо шарикони байналмилаливу минтақавӣ, аз ҷумла UNODC дар самти мубориза бо муомилоти ғайриқонунии маводи нашъаовар маълумот дод. Зимни муаррифии маҷалла, тамоюлҳои асосии инкишофи вазъи мухаддиротӣ дар кишвар ва минтақа, тадбирҳои андешидаи Ҳукумати Ҷумҳурии Тоҷикистон, вазорату идораҳо, ҳамчунин, созмонҳои байналмилалӣ ва ҷамъиятӣ дар самти назорати муомилоти ғайриқонунии маводи нашъаовар ва пешгирии нашъамандӣ, мубориза бо қочоқи маводи мухаддир, гурӯҳҳои муташаккили ҷинояткор, мустаҳкам намудани сарҳади давлатӣ, гузарондани амалиёти муштараки зиддимухаддиротӣ бо мақомоти ҳифзи ҳуқуқи кишварҳои минтақа дар меҳвари таваҷҷуҳ қарор дода шуд.
Ҷереми Милсон, ҳамоҳангсози калони Барномаи минтақавӣ барои Афғонистон ва кишварҳои ҳамсояи СММ, зимни суханронӣ ба нақши Ҳукумати Ҷумҳурии Тоҷикистон дар масъалаи ташкили назорат аз болои муомилоти ғайриқонунии маводи нашъаовар, густариши ҳамкориҳои минтақавию байналмилалӣ вобаста ба таҳкими амният баҳои баланд дод. Номбурда афзуд, ки Раёсати СММ оид ба маводи нашъаовар ва ҷинояткорӣ Ҷумҳурии Тоҷикистонро дар амри мубориза бо ин вабои аср шарики боэътимоди худ мешиносад ва ба ҷойгоҳи он дар муқовимат бо гардиши ғайриқонунии маводи нашъаовар эҳтиром мегузорад.
Сафаргул АЛИМОВА,
«Ҷумҳурият»
Баёни ақида (0) Санаи нашр: 15.05.2018 №: 95 Мутолиа карданд: 1059
