ҳуқуқ
ҲУШДОР. ПАЙРАВИ «САЛАФИЯ» ПАНҶ СОЛ ЗИНДОНӢ ШУД
Суди ноҳияи Шоҳмансур сокини шаҳри Душанбе Олимxон Исроиловро барои пайравӣ ва тарғиби ақидаҳои равияи «Салафия», яъне ба роҳ мондани фаъолияти ташкилоти экстремистӣ (ифротгароӣ), айбдор дониста, ӯро маҳкуми зиндон кард.
Тавре маълум гардид, судшаванда Олимxон Исроилов таълимоти равияи «Салафия» - ро, ки баҳри таъмини ҳимояи асосҳои сохти конститутсионӣ, амнияти давлатии Ҷумҳурии Тоҷикистон ва ҳуқуқу манфиатҳои қонунии шаҳрвандон, пешгирии фаъолияти экстремистӣ, ҳолатҳои барангехтани кинаю адоват ва низои динию мазҳабӣ бо таъйиноти Суди Олии Ҷумҳурии Тоҷикистон аз 8 декабри соли 2014 иттиҳоди экстремистӣ (ифротгароӣ) эътироф шудааст, тарғиб намудааст. Ӯ тарзу усули намозгузории равияи «Салафия» - ро дуруст шумурда, ба тарғибу ташвиқи он мепардозад ва мазҳаби «Ҳанафӣ» - ро инкор мекунад.
Судшаванда, дар маҷлиси судӣ аз кирдори содиркардаи худ изҳори пушаймонӣ карда иброз дошт, ки соли 2001 ба назди падараш Ҳайдаралӣ Исроилов ба Русия меравад. Олимхон дар Русия бо Алишер ном шахс, ки ба худ тахаллуси Салафиро гирифтааст, шинос мешавад. Ӯ баъд аз шинос шудан бо Алишер, пайрави «Салафия» шуда, таълими ин равияро ба тариқи телефони мобилӣ ба роҳ мондааст. Ҳангоми ба Ҷумҳурии Тоҷикистон баргаштанаш бо кирдорҳои ғайр ба масҷидҳо рафта, ақидаҳои пайравони равияи «Салафия» - ро тарғиб менамуд.
Олимхон Исроилов 26 январи соли 2018, тахминан соатҳои 13:30 дақиқа, баъди адои намози ҷумъа дар масҷиди Aл - Бухорӣ аз ҷониби кормандони ШВКД - 1 дар ноҳияи Шоҳмансури шаҳри Душанбе дастгир мешавад. Ҳангоми тафтишот аз телефони мобилии ӯ саптҳои видеоии ҷангҳои Сурия ва таълимотҳои динӣ оид ба он ёфт гардид.
Суд баъди баррасии парвандаи мазкур Олимxон Исроиловро бо моддаи 3073 қисми 2 - и Кодекси ҷиноятии Ҷумҳурии Тоҷикистон гунаҳгор кард. Бо ҳукми суд нисбат ба ӯ ҷазои маҳрум сохтан аз озодӣ ба муҳлати 5 сол, бо адо намудан дар колонияҳои ислоҳии дорои низомаш пурзӯр таъйин карда шуд.
Шарифхон САЙДАЛИЗОДА,
судяи суди ноҳияи Шоҳмансур
Баёни ақида (0) Санаи нашр: 16.05.2018 №: 96 Мутолиа карданд: 1097
