ҳуқуқ
«ШАҲРИ БЕХАТАР». ХУҶАНД, БОХТАР ВА КӮЛОБРО ҲАМ ФАРО МЕГИРАД
Тавассути низоми худкори идоракунии «Шаҳри бехатар», танҳо дар се моҳи аввали соли равон, дар пойтахти мамлакат шаҳри Душанбе 32 ҷиноят ошкор гардида, 65 341 ҳолати ҳуқуқвайронкунӣ дар самти танзими воситаҳои нақлиёт сабт шудааст.
Ин рақамҳоро Бобоҷон Муродов, муовини сардори Маркази идораи нақлиёт ва тартиботи ҷамъиятии «Шаҳри бехатар» - и Вазорати корҳои дохилии ҷумҳурӣ, зимни як суҳбати вижа дар ихтиёри мо гузошт. Ба гуфтаи ӯ, низоми худкори идоракунӣ дар соҳаи нақлиёт аз ду самти асосӣ - «Маҷмааи электронии танзими ҳаракат дар роҳ» ва «Таъмини тартиботи ҷамъиятӣ», иборат мебошад.
Зикр гардид, ки камераҳои баландсифати мушоҳидавии марказ, ки «Политсияи электронӣ» ном бурда мешаванд, дар масофаи то 200 метр ҳар гуна қонуншиканӣ ва ҳуқуқвайронкуниро ба навор мегиранд. Вазифаи асосии онҳо танҳо аз назорати воситаҳои нақлиёт иборат набуда, ҳолатҳои авбошӣ, мастӣ, дуздӣ, рабудани воситаҳои нақлиёт, бадахлоқӣ, кашидани носу сигор дар ҷойҳои ҷамъиятӣ, бархӯрду низои нафарони алоҳидаро низ ошкор месозанд.
Агар ба панҷ сол пеш назар афканем, дар ҳудуди шаҳр дар як рӯз аз 3 то 5 ҳазор қонуншиканӣ ба қайд гирифта мешуд. Бо насб гардидани камераҳои назоратӣ ҳодисаҳои нақзи қонун камтар ба назар мерасанд. Яке аз масъалаҳои ҳалталаби дигар ин тамбашавӣ дар роҳҳо мебошад. Аз аввали сол тавассути камераҳои назоратӣ 2 2 91 ҳолати тамбашавӣ дар роҳу гардишҳо ба таври видеоӣ сабт шуд. Дар ин росто аз ҳуқуқвайронкунандагон зиёда аз 104 миллион сомонӣ ҷарима ситонда шуда, ба буҷети давлат ворид гардид. Ба гуфтаи Бобоҷон Муродов, қарор аст, барои пешгирӣ кардани ҷинояткорӣ дар ҳудуди шаҳри Душанбе, боз дар 7 чорроҳа ва 80 нуқтаи осебпазир камераҳои назоратӣ насб карда шавад.
Вобаста ба фарогирии камераҳои назоратӣ дар дигар манотиқи кишвар масъулони низоми худкори идоракунӣ дар соҳаи нақлиёт - «Шаҳри бехатар» иттилоъ доданд, ки мувофиқи нақша дар шаҳрҳои Хуҷанд, Кӯлоб ва Бохтар чунин камераҳо ба зудӣ насб хоҳанд шуд. Ҳоло дар ин самт корҳои муҳандисию лоиҳакашӣ идома доранд.
Сафаргул АЛИМОВА, «Ҷумҳурият»
Баёни ақида (0) Санаи нашр: 16.05.2018 №: 96 Мутолиа карданд: 1075
