маориф
80 ҳазор китоби электронӣ дар хизмати донишҷӯён
Вазифаи асосии донишкада тарбияи кадрҳои баландихтисоси забондон аз рӯи 25 ихтисос ва дар иртибот ба ин баланд бардоштани сифати таълим аст.
Дар донишкада айни замон 2701 нафар донишҷӯ, аз ҷумла 280 нафар бо квотаи президентӣ таҳсил дорад. Имсол онро 461 нафар хатм кард, ки 281 нафар омӯзгор ва 180 нафарашон тарҷумон буданд,- зикр намуд Марҳабо Ҷабборова, ректори Донишкадаи давлатии забонҳои ҷумҳурӣ.
Барои донишҷӯён шароити мусоиди таълим фароҳам оварда шудааст. 5 синфхонаи компютерӣ, ки 150 компютер дорад ва аз ин 30 компютер тавассути «Тоҷиктелеком» ва «Истера» ва 10 компютер ба воситаи телефони анъанавӣ бо Интернет пайваст аст, мавриди истифода қарор дорад. Дарсҳои тахассусӣ дар ду синфхонаи лингафонӣ ва ҳафт моҳвораи қабули телевизиони кишварҳое, ки забонашон омӯхта мешаванд, баргузор мегарданд. Дар донишкада 130 муаллим ба корҳои илмӣ-методӣ машғул аст. Дар ин давра чор рисолаи номзадӣ ҳимоя шуд. 17 номгӯй китоби дарсии муаллимон аз нашр баромад. Дар назди донишкада шӯъбаи аспирантура ба фаъолият оғоз кард. Ҳамчунин 80 кори илмӣ, илмӣ-методӣ, дастурҳои таълимӣ, китобҳои дарсӣ ва мақолаҳои илмӣ ба нашр расид.
Дар баробари китобхонаи маъмулӣ, ки хазинаи он бо 3500 нусха китоб ғанитар гардид, китобхонаи электронии дорои 80 ҳазор китоби электронӣ низ барои баланд бардоштани сифати таълим мусоидат менамояд.
У. МУРОД
Баёни ақида (0) Санаи нашр: №: Мутолиа карданд: 6053
