маориф
МАОРИФИ ТОҶИКИСТОН. МУҲОКИМАИ КОРШИНОСОНИ БАЙНАЛМИЛАЛӢ
Дар Донишгоҳи славянии Тоҷикистон - Русия бо ташаббуси Вазорати маориф ва илми ҷумҳурӣ ва дастгирии Бонки ҷаҳонӣ зери унвони «Омӯзиш ҳамчун воситаи татбиқи дурнамои рушд» ҷаласа баргузор гардид.
Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода вобаста ба роҳҳои ислоҳот ва рушди соҳаи маориф, ки аз масъалаҳои калидии Ҳукумати Ҷумҳурии Тоҷикистон аст, сухан ронд.
Зикр гашт, ки новобаста аз идомаи буҳрони молиявии ҷаҳонӣ дар соли 2018 маблағгузории соҳаи маориф дар Тоҷикистон афзоиш ёфта, ба 3 миллиарду 863,1 миллион сомонӣ расонда мешавад, ки нисбат ба соли сипаришуда 281,9 миллион сомонӣ зиёд буда, 18 дарсади ҳаҷми умумии хароҷоти Буҷети давлатиро ташкил медиҳад. Вазири маориф ва илм Нуриддин Саид зимни баррасии масъалаҳои умдаи соҳаи маориф аз ҳамкориҳои босамар ва манфиатбахши вазорат бо Бонки ҷаҳонӣ, ки торафт вусъат меёбад ва он боиси пешрафти бисёр самтҳои соҳаи мазкур гаштааст, изҳори назар кард.
Дар давоми ҷаласа намояндагони Бонки ҷаҳонӣ ва мутахассисони соҳа оид ба мавзӯи «Дурнамои маорифро дар Ҷумҳурии Тоҷикистон чӣ тавр амалӣ сохтан мумкин аст?» машварат созмон доданд.
Директори соҳаи маорифи Бонки ҷаҳонӣ Кейко Мива таҳти унвони «Оид ба рушди ҷаҳонӣ - 2018. Омӯзиш ҳамчун воситаи татбиқи дурнамои рушд» маърӯзаи пурмуҳтаво намуд. Номбурда зимни таҳлили ислоҳоти соҳаи маориф ва дурнамои он аз кӯшишҳои Ҷумҳурии Тоҷикистон дар самти рушди соҳа изҳори қаноатмандӣ кард.
Дар чорабинӣ, инчунин, намояндаи доимии Бонки ҷаҳонӣ дар Ҷумҳурии Тоҷикистон оид ба масъалаҳои маориф Ян - Петер Олтерс саволу ҷавоб ва гуфтугӯ доир намуд.
Ян - Петер Олтерс доир ба фаъолияти Вазорати маориф ва илм ва дигар муассисаҳои таълимӣ фикру андешаҳои худро иброз карда, аз ҷумла зикр намуд, ки таваҷҷуҳи пайваста ба ин соҳаи муҳими иҷтимоӣ далели он аст, ки ҷумҳурии мо барои ояндаи рӯшану шукуфои халқ, бавижа ҷавонону наврасон, аз тамоми имкониятҳои мавҷуда истифода мебарад.
Бузургмеҳри БАҲОДУР,
«Ҷумҳурият»
Баёни ақида (0) Санаи нашр: 28.05.2018 №: 105 Мутолиа карданд: 1450
