номаҳо
АЗ ПЕШВОИ МИЛЛАТ СИПОСГУЗОРАМ!
Марҳаматнисо Атобековаро ҳунари қаннодӣ овозадор кард. Ӯро имрӯз на танҳо дар шаҳри Хоруғ, балки дар Вилояти Мухтори Кӯҳистони Бадахшон ҳамчун бонуи ҳунарманд мешиносанд. Кулчақанду шириниҳои корхонаи Марҳаматнисо дастархони сокинони шаҳр ва деҳоти гирду атрофро зеб медиҳанд.
- Айёми мактабхонӣ пухтани намудҳои гуногуни шириниро машқ мекардам. Баъзан, шириниҳои пухтаам ба ҳама писанд меомаданду гоҳе ба иштибоҳ роҳ медодам, аммо волидонам маро ҳамеша дастгирӣ мекарданд. Баъдан, аз барномаҳои пухтупази телевизион ва маҷаллаю рӯзномаҳо бисёр чизҳои навро азхуд кардам. Оҳиста-оҳиста маҳсулоти пухтаам писанди ҳамагон шудан гирифт, - иброз дошт зимни суҳбат Марҳаматнисо.
Ӯ дар пухтани торт хеле усто шуду ҳамаро дар ҳайрат гузошт. Барои Марҳаматнисои ҷавон, ки ҳамеша дар фикри пухтани намуди нави ширинӣ ва тортҳои болаззат буд, фақат як чиз - набудани ҷой ва шароит барои кор садди роҳ мешуд.
Инак, зану шавҳар бо кумаки мақомоти иҷроияи ҳокимияти давлатии шаҳр дар як гӯшаи шаҳри Хоруғ қитъаи замини сангзореро гирифта, барои сохтмони бинои корхонаи қаннодӣ тахту ҳамвор карданд. Дар сохтмон заҳмат кашиданду дар як гӯшаи майдони «Дӯстӣ»-и шаҳри Хоруғ бинои дуошёнаи корхонаи қаннодӣ қомат афрохт, ки ҳуснафзои шаҳр гардид. Барои сохтмони он зиёда аз 80000 сомонӣ сарф шуд.
- Ба ман муяссар гардид, ки соҳиби гранти президентӣ шавам. Лоиҳаи пешниҳодкардаамро омӯхта, писандиданд ва барои амалигардонии он ба ман 40000 сомонӣ грант ҷудо карданд. Ин имкон дод, ки корхонаро бо таҷҳизоти зарурӣ пурра таъмин созам. Аз Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки мо – занон, бахусус бонувони ҳунармандро ҳамаҷониба дастгирӣ менамоянд, басо сипосгузорам. Албатта, агар сулҳу ваҳдат намебуд, ба орзую мақсадамон намерасидем. Шукри Пешвои миллат ва давлату Ҳукумати кишвар мекунем, ки дар ҳаққи мо ҳамеша ғамхорӣ зоҳир мекунанд.
Р. РАҲМОНҚУЛОВ, шаҳри Хоруғ
Баёни ақида (0) Санаи нашр: 29.05.2018 №: 106 Мутолиа карданд: 3006
