порлумон
РЕАДМИССИЯ. ТАСВИБИ БОЗ ЯК САНАДИ МУҲИМ
Маҷлиси намояндагони Маҷлиси Олии мамлакат дар ҷаласаи навбатии худ боз як ҳуҷҷатеро ба тасвиб расонд, ки дар таҳкими ҳамкориҳо ва рушди муносиботи дуҷонибаи Тоҷикистону Қазоқистон саҳифаи нав мекушояд. Вакилони порлумон Созишномаи байни Ҳукумати Ҷумҳурии Тоҷикистон ва Ҳукумати Ҷумҳурии Қазоқистон дар бораи реадмиссияи шахсон ва Протоколи иҷроия оид ба тартиби амалисозии онро, ки аз тарафи Вазорати корҳои дохилӣ таҳия ва пешниҳод гардидааст, ҷонибдорӣ карданд.
Мафҳуми реадмиссия ин розигии давлат барои бозпас баргардондани шаҳрвандони худ аз дигар кишвар ба ҳудуди давлати худ дар ҳолати даст задани онҳо ба нақзи муқаррароти будубош, яъне вуруд, иқомат ва хуруҷи шаҳрвандон мебошад. Ин як намуди баровардани маҷбурӣ аз ҳудуди давлати дигар буда, ҳамчун ҷазо татбиқ намегардад.
Ин санад ҳам дар баробари Созишномаи байни Ҳукумати Ҷумҳурии Тоҷикистон ва Ҳукумати Ҷумҳурии Қазоқистон дар бораи тартиби будубоши шаҳрвандони Ҷумҳурии Тоҷикистон дар ҳудуди Ҷумҳурии Қазоқистон ва шаҳрвандони Ҷумҳурии Қазоқистон дар ҳудуди Ҷумҳурии Тоҷикистон 14 марти соли 2018 зимни сафари расмии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Қазоқистон дар шаҳри Остона ба имзо расида буд.
Назар ба гуфтаи Маҳмадсаид Саидзода, муовини вазири корҳои дохилии Ҷумҳурии Тоҷикистон, созишномаи мавриди назар аз муқаддима, 15 модда, протоколи иҷроия ва замима иборат буда, барои рушди ҳамкориҳо байни Ҷумҳурии Тоҷикистон ва Ҷумҳурии Қазоқистон равона шудааст.
Дар созишнома масъалаи реадмиссияи иштибоҳӣ ва ҳал намудани масъалаҳои ба он вобаста, муҳлати ирсоли дархост ва реадмиссия, истирдоди шахси реадмиссияшаванда пешбинӣ шудааст.
Мунаввари САФАР, «Ҷумҳурият»
Баёни ақида (0) Санаи нашр: 14.06.2018 №: 118 Мутолиа карданд: 5363
