ҳуқуқ
ЗӮРОВАРӢ ДАР ОИЛА МАРДИ 60 – СОЛАРО БА ҶАВОБГАРӢ КАШИД
Баррасии як парвандаи ҷиноятӣ дар суди ноҳияи Вахш нишон медиҳад, ки бо вуҷуди андешидани тадбирҳои иҷтимоиву ҳуқуқӣ то имрӯз мавҷуд будани амалҳои зӯроварӣ дар оила ба назар мерасад, ки бетарафӣ нисбати раванд ба манфиати ҷомеа нест.
Ҳасан Бобоқулови шастсола, сокини ноҳияи Вахши вилояти Хатлон, ҳанӯз соли 1977 бо С. Бобоқулова оила бунёд намуда, соҳиби 8 фарзанд гардиданд. Мавҷуд набудани эҳтироми якдигар 13 декабри соли 2015 боиси ҷудоии ҳамсарон дар оила гардид. Зану шавҳар дар пайи номуросоии бардавом ниҳоят ба воситаи суд ақди никоҳи худро расман бекор карданд. Онҳо дар як манзили истиқоматӣ, вале дар алоҳидагӣ зиндагӣ мекарданд. Кор ба ҷое расид, ки баҳси тақсими замин аъзои оиларо ба сангарҳо ҷудо кард. Моҷарои оилавӣ то рафт доманадору васеътар мешуд. Ҳасан Бобоқулов бо вуҷуди ҷудо шудан аз ҳамсараш дар зарфи чаҳор соли охир ба ҳар баҳона С. Бобоқуловаро озор дода, баъзан ӯро зери лату кӯби ҷисмонӣ қарор медод. Тибқи хулосаҳои пешниҳоднамудаи коршиносони судӣ - тиббии вилояти Хатлон С.Бобоқулова дар натиҷаи лату - кӯб чанд маротиба ҷароҳатҳои гуногуни ҷисмонӣ бардоштааст. Вале ин ҳама кирдори ношояму ғайриқонунӣ бепосух намонда, Ҳасан Бобоқулов барои чунин амалҳои худ ба ҷавобгарӣ кашида шуд.
Суди ноҳияи Вахши вилояти Хатлон парвандаи ҷиноятӣ нисбат ба Ҳасан Бобоқуловро баррасӣ намуда, тибқи моддаи 117 қисми 1-и Кодекси ҷиноятии Ҷумҳурии Тоҷикистон, ба ӯ ҷазо дар намуди маҳрум сохтан аз озодӣ ба муҳлати 1 солу 6 моҳ бо адо намудани ҷазо дар колонияҳои ислоҳии дорои низомаш умумӣ таъйин кард. Баъдан, дар асоси моддаи 71 қисмҳои 1 ва 3 Кодекси ҷиноятии Ҷумҳурии Тоҷикистон ҷазои нисбат ба ӯ дар намуди маҳрум сохтан аз озодӣ таъйиншуда шартан татбиқ нагардида, 1 сол муҳлати санҷишӣ муқаррар карда шуд.
Таъйиноти мазкур дар маҷлиси умумӣ бо иштироки ҳатмии нозирони минтақавии деҳаи Ҳосилобод ва кормандони ШВКД дар ноҳия Вахши вилояти Хатлон муҳокима гардида, баҳри бартараф ва дар оянда роҳ надодан ба чунин камбудиҳо, аз ҷумла бетарафӣ нисбат ба хушунату зӯроварӣ ба нозирони минтақавӣ дастуру супоришҳои қатъӣ дода шуд.
С. ФАЙЗУЛЛОЗОДА,
судяи суди ноҳияи Вахш
Баёни ақида (0) Санаи нашр: 22.06.2018 №: 122-123 Мутолиа карданд: 1179
