маориф
800 довталаб ба курсии донишҷӯӣ нишаст
Шодӣ Сафаров, ректори Донишкадаи давлатии тарбияи ҷисмонии Тоҷикистон ба номи Сайид мӯъмин Раҳимов, дар нишасти матбуотӣ иттилоъ дод, ки имсол 800 довталаб донишҷӯ гардид.
Дар семоҳаи охир донишҷӯён дар 18 мусобиқаи шаҳрӣ, ҷумҳуриявӣ ва байналмилалӣ иштироки фаъол намуданд. Самбочиёни донишкада дар шаҳри Уралски Ҷумҳурии Қазоқистон барои ба даст овардани Ҷоми Ҷаҳон дар гӯштин ширкат варзиданд. Бобури Насимҷон ва Ризвониддин Бурҳонов ҷойҳои сеюмро ишғол карданд.
Устоди донишкада Акмалиддин Каримов дар мусобиқаи ҷаҳонӣ оид ба самбо, ки чанде пеш дар шаҳри Самокови Булғория баргузор гардид, соҳиби ҷоизаи тилло ва унвони ғолиби мусобиқаи ҷаҳонӣ шуд. Устоди дигари донишкада Айниддин Қурбонов ҷойи дуюмро ишғол намуд.
Дар дастаи мунтахаби наврасони кишвар оид ба футбол, ки ба марҳилаи низоми мусобиқоти қаҳрамонии Осиё роҳхат гирифт, 4 нафар донишҷӯи донишкада ширкат варзид.
Ректор дар посух ба пурсиши хабарнигорон изҳор дошт, ки сифати таълим боз беҳтар мегардад ва барномаҳои таълимӣ ва китобҳои дарсии ҷавобгӯи талаботи давр бештару беҳтар таълифу нашр мегарданд.
Абдулқодири РАҲИМ
Баёни ақида (0) Санаи нашр: №: Мутолиа карданд: 5447
