ҳуқуқ
ХАТЛОН. БИНОҲОИ СУДҲО ДАВРА БА ДАВРА ТАЪМИР ХОҲАНД ШУД
Суди Олии Ҷумҳурии Тоҷикистон ҷиҳати иҷрои Фармони Президенти Ҷумҳурии Тоҷикистон «Дар бораи вокуниши шахсони мансабдор ба маводҳои танқидӣ ва таҳлилии воситаҳои ахбори омма» аз 7 феврали соли 2009, № 622 мақолаи «Хатлон: камбудии судҳо зиёданд», ки аз 8 июни соли 2018, № 115 дар рӯзномаи «Ҷумҳурият» нашр гардидааст, мавриди омӯзиш қарор дод.
Дар мақола масъалаҳо оид ба шароити корӣ ва усулҳои корбарии мақомоти судӣ мавриди тадқиқоти журналистӣ қарор гирифта, дарҷ гардидааст, ки «ниҳодҳои судии шаҳру навоҳии вилояти Хатлон дар биноҳои солҳои сиюми асри гузашта бунёдёфта ҷой дода шудаанд, ки бештарашон ҳам аз ҷиҳати бехатарӣ ва ҳам аз ҷиҳати ҷолибияти меъморӣ ҷавобгӯи замон нестанд».
Боиси зикр аст, ки ба таҳкими минбаъдаи мақомоти судӣ ҳамчун шохаи мустақили ҳокимияти давлатӣ аз ҷониби Ҳукумати кишвар таваҷҷуҳи хосса зоҳир мегардад.
Аз ҷумла, бо маблағгузории Ҳукумати ҷумҳурӣ биноҳои маъмурии судҳои ноҳияҳои Шаҳристон, Балҷувон, Нуробод, Шамсиддини Шоҳин, Варзоб, Восеъ, Ванҷ, Шуғнон, Сангвор ва шаҳри Роғун навсозӣ шуда, бо таҷҳизоти корӣ муҷаҳҳаз гардонда шуданд. Ҳамчунин, судҳои ноҳияҳои Вахшу Хуросон бо биноҳои алоҳидаи ҷавобгӯ ба талаботи замони муосир таъмин гардиданд.
Айни замон, сохтмони биноҳои нави судҳои ноҳияҳои Данғара, Тоҷикобод ва Кӯҳистони Мастчоҳ идома дошта, дар назар аст, ки рӯзҳои наздик бинои суди ноҳияи Тоҷикобод мавриди истифода қарор гирад.
Илова бар ин, дар ин давра биноҳои маъмурии судҳои вилояти Суғд ва ВМКБ, судҳои шаҳру ноҳияҳои Исмоили Сомонӣ, Фирдавсӣ, Сино ва Шоҳмансури шаҳри Душанбе, Бохтар, Кӯлоб, Ҷайҳун, Қубодиён, Абдураҳмони Ҷомӣ, Кӯшониён, Фархор, Дарвоз, Рӯшон, Истиқлол, Бӯстон, Айнӣ, Бобоҷон Ғафуров, Исфара, Гулистон, Истаравшан, Турсунзода, Ҳисор, Рӯдакӣ, Ваҳдат, Лахш ва судҳои ҳарбии гарнизонҳои Хуҷанду Хатлон аз таъмири асосӣ бароварда шуданд. Вобаста ба имкониятҳои молиявӣ таъмири дигар биноҳои судҳои ҷумҳурӣ, аз ҷумла судҳои шаҳру ноҳияҳои вилояти Хатлон ба нақша гирифта шудаанд.
Бояд қайд кард, ки навсозиву бо таҷҳизоти муосир таъмин намудани ҳамаи 25 бинои судҳои шаҳру ноҳияҳои вилояти Хатлон маблағҳои зиёдро талаб менамояд. Аз ин лиҳоз, бунёду таъмири биноҳои судҳо тибқи нақша сурат гирифта, бо назардошти имкониятҳои молиявӣ давра ба давра амалӣ мегарданд.
А. АШӮРЗОДА,
муовини якуми раиси Суди Олӣ
Баёни ақида (0) Санаи нашр: 06.07.2018 №: 133 Мутолиа карданд: 1078
