маориф
Донишгоҳи тиббӣ 70 -сола мешавад
Убайдулло Қурбонов, ректори Донишгоҳи давлатии тиббии Тоҷикистон, дар оғози нишасти матбуотӣ иброз дошт, ки рӯзҳои 20-21 ноябр ҷашни бошукӯҳи 70 -солагии донишгоҳ баргузор мегардад. Ба ин муносибат энсиклопедияи он ба забонҳои тоҷикӣ, русӣ ва англисӣ бо сифати хуб ба табъ расид. Ба гуфти ректор, донишгоҳ дар тӯли фаъолияташ беш аз 32 ҳазор мутахассиси варзидаро тайёр намудааст, ки дар 32 мамлакат фаъолият доранд. Зикр гардид, ки ДДТТ солҳои 2005-2009 ба натиҷаҳои назарраси иқтисодӣ ноил гашт. Дар соли 2009 буҷети он ба 16 миллион сомонӣ расид, ки 64 дарсади онро маблағҳои хусусӣ ташкил медиҳад ва нисбат ба соли 2004 беш аз 12 маротиба боло рафтааст. Ба мақсади татбиқи «Барномаи рушди ДДТТ ба номи Абӯалӣ ибни Сино барои солҳои 2006-2015» дар давоми 4 соли охир ба маблағи 8,54 миллион сомонӣ таҷҳизоти таълимӣ, илмӣ ва муолиҷавӣ харидорӣ шуданд. Музди меҳнати ҳайати профессорону омӯзгорон низ дар ин муддат аз 11 то 17 маротиба зиёд шуд.
У. Қурбонов гуфт, ки дар муддати нӯҳ моҳи соли ҷорӣ чандин марказҳо, аз ҷумла такмили ихтисос ва бозомузӣ, иттилоотӣ оид ба маводи доруворӣ, тарҷумаи адабиёт ва истилоҳоти соҳавӣ, технологияи иттилоотӣ ва компютерӣ, ташхисию табобатӣ ва маркази ягонаи тестӣ таъсис дода шуд, ки далели фаъолияти пурмаҳсули роҳбарияти донишгоҳ мебошад. Маркази тарҷумаи адабиёт ва истилоҳоти навтаъсис тарҷумаи китобҳои «Бемориҳои ҷарроҳӣ», «Бемориҳои сироятӣ», «Луғати истилоҳоти биологӣ», «Бемориҳои дарунӣ», «Шарҳи луғоти тиббӣ» ва ғайраро ба сомон расонид, ки барои пешрафти таълиму тадрис ба забони давлатӣ муфид ва бамаврид аст.
Мунаввари САФАР
Баёни ақида (0) Санаи нашр: №: Мутолиа карданд: 5432
