туризм
ТОҶИКИСТОН. АЗ "ДАРҲОИ КУШОДА" ТО "САРЗАМИНИ САЙЁҲОН"
Сиёсати «дарҳои кушода» аз нахустин иқдомҳои Президенти мамлакат муҳтарам Эмомалӣ Раҳмон мебошад, ки барои густариши ҳамкориҳои мутақобилан судманди байналмилалии Тоҷикистон заминаи боэътимод гузошт, ба рушди босуботи соҳаҳои гуногуни хоҷагии халқ, аз ҷумла сайёҳии мамлакат, мусоидат кард ва Ҷумҳурии Тоҷикистонро ҳамчун кишвари сулҳхоҳу тараққипарвар ба ҷаҳониён муаррифӣ намуд. Ҳанӯз соли 1993 Сарвари давлат аввалин маротиба аз минбари СММ баромад намуда, ҷомеаи ҷаҳониро бо нақшаву ниятҳои бунёдкорона, ҳадафҳои сиёсии сулҳҷӯёна, расидан ба ваҳдати миллӣ, инчунин, таҳкиму тақвияти ҳамкориҳои Тоҷикистон бо ҳама кишварҳои дӯсту сулҳпарвари ҷаҳон ошно намуданд ва сиёсати “дарҳои кушода”- ро эълон доштанд.
Ҳоло бо талошу заҳматҳои Пешвои миллат муҳтарам Эмомалӣ Раҳмон Ҷумҳурии Тоҷикистон бо 119 давлати дунё муносибатҳои дипломатӣ, иқтисодӣ, тиҷоратӣ ва фарҳангиро ба роҳ мондааст. Тайи солҳои охир Ҷумҳурии Тоҷикистон дар ҷаҳон ҳамчун кишвари пешоҳанг дар ҳалли масоили марбут ба об эътироф гардид, ки Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон дар ин ҷода саҳми бузурги бесобиқа доранд.
Оромӣ ва ваҳдати миллӣ омилҳои муҳимтарини рушди на танҳо сайёҳӣ, балки тамоми соҳаҳои хоҷагии халқи кишвар ба шумор мераванд. Хушбахтона, дар Ҷумҳурии Тоҷикистон суботи сартосарӣ ҳукмфармост. Тоҷикистон дар мубориза бо хатарҳои замони муосир, аз ҷумла терроризму экстремизм, дар сафи пеши ҷомеаи ҷаҳонӣ қарор дошта, дар ин ҷода тадбирҳои саривақтӣ меандешад. Ташкили Конфронси байналмилалии сатҳи баланд таҳти унвони “Муқовимат бо терроризм ва ифротгароии хушунатомез” дар шаҳри Душанбе мисоли барҷастаи ин гуфтаҳост. Пешвои миллат зимни суханронӣ дар ин конфронс таъкид карданд: “Тоҷикистон дар арсаи мубориза бар зидди терроризму ифротгароӣ, тундгароӣ ва дигар хатару таҳдидҳои замони муосир, аз қабили гардиши ғайриқонунии маводи мухаддир ва силоҳ, ҷинояткориҳои муташаккили фаромиллӣ ва киберҷиноятҳо шарики табиии ҳамаи давлатҳои дунё ва созмонҳои байналмилаливу минтақавӣ мебошад”.
Оромию субот шарти муҳимтарини рушди иқтисодӣ, аз ҷумла соҳаи сайёҳӣ мебошад. Хушбахтона, дар кишвари мо барои рушди сайёҳӣ тамоми заминаҳои муҳимтарин фароҳам ва иқтидору имкониятҳо фароханд. Мамлакат дорои арзишҳои бузурги таърихию фарҳангӣ, иқлими муътадил ва табиати зебою рангин мебошад. Пешниҳоди Соли рушди сайёҳӣ ва ҳунарҳои мардумӣ эълон кардани соли 2018 боиси баланд гардидани ҳисси масъулиятшиносии дастандаркорони соҳа шуда, чорабинӣ ва иқдомҳои наверо ба миён овардааст. Ба гунаи мисол, соли ҷорӣ ба таври назаррас беҳбудӣ ёфтани шароити қабули меҳмонони хориҷӣ дар ноҳияҳои Ховалинг, Шамсиддини Шоҳин, Айнӣ, Мурғоб, Лахш ва минтақаҳои дигари ҷумҳурӣ ба мушоҳида мерасад. Хатсайрҳои нави сайёҳӣ ба ҷойҳои тамошобоб таъсис ёфта, бунёди меҳмонхона бо арнаментҳои миллӣ барои сайёҳон ва рушди менеҷменти туризм миёни аҳолӣ тавассути семинару омӯзишҳо амалӣ карда мешавад, рӯйхати ҳунарҳои мардумӣ тартиб дода, тарғиби сайёҳии экологӣ тавассути баргузории намоишгоҳҳо муаррифӣ ва хатсайрҳои нави сайёҳӣ дар самти сайёҳии кӯҳнавардӣ ва шикор омода мегарданд. Ҳамин аст, ки ташрифи сайёҳон, хусусан аз кишварҳои узви Иттиҳоди Давлатҳои Мустақил ва Созмони ҳамкории Шанхай ба кишвар меафзояд.
Муҳим ин аст, ки рушду тараққии воқеии соҳаи туризми кишвар дар меҳвари таваҷҷуҳи доимии Президенти мамлакат муҳтарам Эмомалӣ Раҳмон қарор дорад. Бо назардошти ин, бо эътимод метавон гуфт, ки дар заминаи ин таваҷҷуҳ ва иқтидору имконоти бесобиқа соҳаи сайёҳӣ бо суръати баланд рушд намуда, Тоҷикистон “сарзамини сайёҳон” ном мегирад.
Муслима МАННОНОВА,
мудири студияи таълимии телевизион
ва радиои факултети журналистикаи ДМТ
Баёни ақида (0) Санаи нашр: 10.07.2018 №: 135 Мутолиа карданд: 973
