ҳуқуқ
НОҲИЯИ ФИРДАВСӢ. ЯК НИШАСТИ МУҲИМ
Бо мақсади коҳиш додани сатҳи амалҳои коррупсионӣ ва мунтазам бартараф намудани монеаҳо ва фароҳам овардани шароит барои инкишофи арзишҳои демократӣ Барномаи идоравии (соҳавии) зиддикоррупсионии мақомоти иҷроияи маҳаллии ҳокимияти давлатии ноҳияи Фирдавсии шаҳри Душанбе оид ба татбиқи «Стратегияи муқовимат ба коррупсия дар Ҷумҳурии Тоҷикистон барои солҳои 2013 - 2020» фаъолияти пурсамар нишон дода истодааст.
Ин нуктаро Шералӣ Хушзода, раиси комиссияи ҷамъиятӣ дар назди мақомоти иҷроияи маҳаллии ҳокимияти давлатии ноҳияи Фирдавсӣ «Оид ба пешгирии коррупсия», дар ҳисоботи шашмоҳаи худ, дар ҷаласаи аъзои комиссия зикр кард.
Дар шаш моҳи аввали соли ҷорӣ, аз ҷониби комиссияи ҷамъиятӣ тибқи нақшаи чорабиниҳо оид ба пешгирӣ ва кам кардани амалҳои коррупсионӣ, вусъат додани тарбияи ҳуқуқӣ ва баланд бардоштани маърифати ҳуқуқии хизматчиёни давлатӣ дар ташкилоту корхонаҳо бо сокинони шаҳраку маҳаллаҳо, муассисаҳои таълимӣ ва томактабии ҳудуди ноҳия зиёда аз 20 суҳбату вохӯриҳо гузарондаанд.
Дар ин ҷаласа Маҷидӣ Абдукарим, сарнозири раёсати муносибатҳои байналмилалӣ, робита бо ҷомеа ва ВАО-и сарраёсати агентӣ, иштирок ва суханронӣ намуд. Тавре номбурда гуфт, яке аз самтҳои асосии фаъолияти Агентии назорати давлатии молиявӣ ва мубориза бо коррупсия тафтиши буҷети муассисаҳои давлатӣ ва самаранок истифода бурдани маблағҳои буҷетӣ аз ҷониби муассисаҳо ба ҳисоб меравад. Вазифаи дигари ин сохтор назорат ва фош кардани маблағҳои буҷетие, ки аз ҷониби кормандони муассисаҳои давлатӣ ғайри мақсад истифода мешавад.
Дар ҷаласа оид ба рафти иҷрои нақшаи кории дохилиидоравии ноҳия ва таъмини иҷрои «Стратегияи муқовимат бо коррупсия дар Ҷумҳурии Тоҷикистон барои солҳои 2013-2020» гузориш дода шуда, зикр гардид, ки комиссияи ҷамъиятӣ тибқи нақша - чорабиниҳо барои солҳои 2017 - 2018 фаъолияти худро бо ҷалби сохторҳои давлатию ҷамъиятӣ пеш бурда, ҳамчунин, ҷиҳати амалӣ намудани вазифаҳои ба зимма гузошташуда оид ба масъалаҳои амалигардонии сиёсати зиддикоррупсионӣ корҳои назаррасро ба сомон расонда истодааст. Инчунин, масъулон баҳри амалисозии корҳои фаҳмондадиҳии барномаҳои давлатӣ, ташаккул додани ҷаҳонбинии зиддикоррупсионӣ ва фазои оштинопазир ба он бо кормандони мақомоти давлатӣ, ташкилоту корхонаҳо новобаста аз шакли моликияташон ва дар байни ҷомеа, вохӯриҳои судманд гузаронда истодаанд.
Сафаргул АЛИМОВА,
Маҳмуд БАҲРОМ,
«Ҷумҳурият»
Баёни ақида (0) Санаи нашр: 10.07.2018 №: 135 Мутолиа карданд: 1049
