маориф
НОҲИЯИ ТЕМУРМАЛИК. АВЛАВИЯТ БА МАОРИФ
Маориф яке аз соҳаҳои афзалиятнок ва калидӣ ба ҳисоб рафта, таҳти таваҷҷуҳи ҳамешагии Сарвари давлат ва Ҳукумати кишвар қарор дорад. Маорифчиёни ноҳияи Темурмалик низ аз раванди умумии таълиму тарбия қафо намонда, толибилмонро дар рӯҳияи ватандӯстӣ ва хештаншиносӣ тарбия намуда истодаанд.
Тавре мудири шуъбаи маорифи ноҳия Шамсулло Сатторов иттилоъ дод, айни ҳол дар ноҳияи Темурмалик 51 муассисаи таълимӣ амал мекунад, ки аз онҳо 37 – тоаш муассисаи таҳсилоти миёнаи умумӣ, 5 муассисаи таҳсилоти томактабӣ, 2 интернат барои ятимон ва бепарасторон, 1 гимназия ва 4 муассисаи таҳсилоти умумии асосӣ мебошад.
Мавриди зикр аст, ки соли ҷорӣ дар ноҳия 5 муассисаи таълимӣ дар ҳамкорӣ бо Вазорати маориф ва илми ҷумҳурӣ аз ҷониби ташкилотҳои хориҷӣ сохта мавриди истифода қарор дода шуд. Дар ин давра барои таъмири муассисаҳои таълимӣ аз ҳисоби буҷети маҳаллӣ 155 500 сомонӣ ҷудо гардид.
Толибилмони ноҳия дар озмуну олимпиадаҳои ҷумҳуриявӣ фаъолона ширкат меварзанд. Ҳамин аст, ки хонандагони муассисаҳои таълимии ноҳия соли 2018 сазовори 18 медал гардиданд. Аз ин 2 медали тиллоро дар сатҳи ҷумҳурӣ соҳиб шуданд.
Имсол аз шумораи 1042 хатмкунанда 865 нафар ҳуҷҷатҳояшонро ба Маркази миллии тестии назди Президенти Ҷумҳурии Тоҷикистон супориданд.
Масъалаи компютеркунонӣ низ дар муассисаҳои таълимии ноҳия хуб ба роҳ монда шудааст. Айни ҳол теъдоди онҳо 589 ададро ташкил медиҳад, ки ба ҳар 12 хонанда 1 компютер рост меояд.
Айни замон 121 нафар хатмкардагони ноҳия тибқи Квотаи президентӣ дар донишгоҳҳои мамлакат таҳсил менамоянд. Соли ҷорӣ 18 хатмкардаи мактабҳои ноҳия соҳиби квота гардид, ки аз он 9 духтару 9 писар мебошад, - гуфт Ш. Сатторов.
И. РАҶАБАЛӢ,
Рӯзноманигор
Баёни ақида (0) Санаи нашр: 23.07.2018 №: 144 Мутолиа карданд: 1819
